2024-cü il oktyabrın 15-də Xəzər Universitetində Psixologiya departamenti və Psixologiya klubunun birgə əməkdaşlığı ilə təşkil olunan "Maddə asılılığına biopsixososial yanaşma" mövzusunda seminar keçirilmişdir. Seminar Xəzər Universitetinin Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov tərəfindən aparılmışdır. Seminarın əsas məqsədi diqqəti dünyada geniş yayılmış maddə asılılığının zərərlərinə cəlb edərək, gənclər arasında geniş yayılmasına qarşı profilaktik addımın atılması idi.
Mirsadiq Muxtarov maddə asılılığı anlayışına toxunmuş, bu problemin fərqli amillərini, habelə bioloji, psixoloji və sosial faktorların təsirini izah etmişdir. Bununla yanaşı, seminar zamanı asılılığın yaranma səbəbləri, onun müalicə yolları və bu mövzuda müasir yanaşmalar geniş müzakirə olunmuşdur.
Seminarda maddə asılılığınən yalnız bir insanın psixoloji problemi deyil, həmçinin cəmiyyətin müxtəlif səviyyələrinə təsir edən geniş miqyaslı bir məsələ olduğu qeyd edilmişdir. Onun klinik kriteriyalarına nəzər yetirilmiş, asılılığın müalicəsində fərqli terapiya növlərinin, həmçinin ailə və sosial dəstəyin əhəmiyyəti vurğulanmışdır.
Tədbir tələbələrin marağına səbəb olmuş və onlar mövzu ətrafında geniş fikir mübadiləsi aparmışlar.