2024-cü il oktyabrın 16-da Xəzər Universitetində Psixologiya departamentinin təşkilatçılığı ilə 3-cü kurs psixologiya tələbələri üçün Mediasiya mövzusunda maarifləndirici dərs keçirilmişdir. Dərsə qonaq qismində mediasiya üzrə mütəxəssis Qasım Şalıyev dəvət olunmuşdur.

Dərsin məqsədi mediasiya prosesinin hüquq və psixologiya sahələrində necə tətbiq olunduğunu, münaqişələrin sülh yolu ilə həllində hansı rolu oynadığını tələbələrə ətraflı şəkildə izah etmək idi. Qasım Şalıyev mediasiyanın yalnız hüquqi deyil, həmçinin psixoloji aspektlərinə toxunaraq, tərəflərin bir-birini daha yaxşı anlamaq üçün hansı vasitələrdən istifadə edə biləcəklərini izah etmişdir.

Seminar zamanı mediasiyanın növləri, onun müxtəlif situasiyalarda tətbiqi və xüsusilə ailə, iş və ictimai mühitdə yaranan münaqişələrin həllindəki əhəmiyyəti geniş müzakirə olunmuşdur. Tələbələr mediasiya texnikaları və mediatorun rolu ilə bağlı suallar verərək, praktiki məsələlər üzərində fikir mübadiləsi aparmışlar.

Tədbirin sonunda departamentin koordinatoru Mələk Kərimova bu cür maarifləndirici seminarların davam etdiriləcəyini bildirərək, mediasiya sahəsinin psixologiya və hüquq təhsili alan tələbələr üçün xüsusi əhəmiyyət daşıdığını vurğulamışdır.