2023-cü il dekabrın 11-də Psixologiya departamentinin koordinatoru Mələk Kərimovanın təşkilatçılığı ilə Türkiyənin Hacettepe Universitetinin məzunu, Nəfəs Klinikasının təcrübəli həkimi, psixiatr Fəhmin Haqverdiyev Xəzər Universitetinin qonağı olub. O, tələbələrə "Loqoterapiya və ekzistensial terapiyalar" mövzusunda mühazirə oxuyub.
Loqoterapiya Avstriyalı neyropsixiatr Viktor Frankl tərəfindən yaradılan bir psixoterapiya növüdür. Loqoterapiya insanın həyatında mənanın və məqsədin əhəmiyyətini vurğulayaraq, psixika və ruh sağlamlığını inkişaf etdirməyə nail olmağı hədəfləyir.
Fəhmin Haqverdiyev də məhz yuxarıda qeyd edilən mövzu ətrafında tələbələrə terapiyaların tarixi inkişafını və fəlsəfəsini ətraflı şəkildə izah edib. Loqoterapiyanın mühüm əhəmiyyəti və bu sahədə fəaliyyət göstərən terapistlərin həssas yanaşmaları, seanslarda diqqət ediləcək məqamlar və müzakirə ediləcək mövzular da mühazirənin əsas məzmununu təşkil edib.
Seminar zamanı tələbələrlə aktiv şəkildə müzakirələr aparılıb. Müzakirələrdə Loqoterapiyanın müasir dövrdəki əhəmiyyəti bir daha vurğulanıb.