2023-cü il sentyabrın 15-də Xəzər Universiteti Mövlana Ədəbi-Fəlsəfi Araşdırmalar İnstitutu və Dillər və ədəbiyyatlar departamentinin birgə təşkilatçılığı ilə Türkiyə Cümhuriyyətinin yüz illiyinə həsr edilmiş “Azərbaycandan dünyaya doğan günəş: Şəms və Mövlana” adlı elmi seminar keçirildi.

Mövlana Ədəbi-Fəlsəfi Araşdırmalar İnstitutunun direktoru Dos. Nəzakət Məmmədlinin moderatorluğu ilə keçirilən tədbirdə Azərbaycanın və Türkiyənin dövlət himnləri ifa olundu. Sonra Nəzakət Məmmədli Nuru Paşanın rəhbərliyi ilə Qafqaz İslam Ordusunun Bakını rus və erməni-daşnak işğalından sentyabrın 15-də xilas etməsinin tarixi əhəmiyyətindən bəhs etdi.

Xəzər Universitetinin rektoru Dos. İradə Xəlilova, Mövlana Ədəbi-Fəlsəfi İnstitutunun təsisçisi Şəhram Oromi, Dillər və ədəbiyyatlar departamentinin müdiri Dos. Dilbər Zeynalova və Hikmət Elmlər Mərkəzinin direktoru, Üsküdar Universiteti Təsəvvüf Araşdırmaları İnstitutunun doktorantı İlahə Kurşun`un açılış nitqləri dinlənildi.

Tanınmış mütəsəvvif, araşdırmaçı-yazar Cemalnur Sarqut “Həzrəti Şəms təlimləri ilə günümüzdə təsəvvüfü yaşamaq” adlı onlayn məruzə ilə çıxış edərək, Şəms Təbrizi və Mövlana Cəlaləddin Ruminin sevgi, barış və təkamülə əsaslanan möhtəşəm mənəvi təliminin günümüzədək davam etdiyini nəzərə çatdırdı.

Filologiya elmləri doktoru, Prof. Şəfəq Əlibəyli “Mövlana nəzmində təzad daşıyan irfani istilahların poetik dialektikası”, Dos. Səadət Şıxıyeva “Hürufi mətnlərində Mövlananı xatırlatmalar”, Dos. Nəzakət Məmmədli “Divani-Kəbirdə vəzn, məna və şeiriyyət uyumu”, Türkiyədən onlayn qoşulan Prof. Reşat Öngören “Şəms və Mövlana əlaqələrində yaşanan olayların təsəvvüf düşüncəsi nəzərindən dəyərləndirilməsi” və Şəhram Oromi “Mənim Şəmsim, Mənim Tanrım” mövzularında məruzə etdilər.

Tədbirdə iştirak edən Türk Dünyası Elmi Strateji Araşdırmalar Mərkəzinin direktoru Dos. Məhəmməd Cəbrayılov türk xalqlarının birliyinin, mədəniyyətlərarası əlaqənin önəmini vurğuladı.

Tanınmış şair, Dos. Şəlalə Ana Himmətli Mövlana Cəlaləddin Rumiyə həsr etdiyi “Mövlana” şeirini oxudu.

Xəzər Universitetinin müəllimləri – Dos. Xatirə Yusifova, Dos. Reyhan Mədətova, fil.üz. f.d. Zəminə Ziyayeva, Sevinc Qənbərova və AMEA Əlyazmlar İnstitutunun əməkdaşları da seminarda iştirak edirdilər

Media mənsubu, Üsküdar Universiteti Təsəvvüf Araşdırmaları İnstitutunun doktorantı, Nəfəs Nəşriyyat Evinin mətbuat müşaviri Tuğçe Yücebilgiç, Ankara Mədəniyyət və Turizm Nazirliyi Vəqflər Baş Müdirliyində çalışan dövlət məmuru Nilufər Taşkın, Üsküdar Universiteti Təsəvvüf Araşdırmaları İnstitutundan Selma Ekşi, Gönül Akkaya, Hülya Taştekin, Gülçin Acun və başqaları – Türkiyədən və Almaniyadan gələn 25 nəfərlik elmi heyət də tədbirə qatılmışdı.

Tədbir müzakirələr, məruzəçilərə ünvanlanan suallar və cavablardan sonra musiqili bədii hissə ilə başa çatdı.