Xəzər Universiteti Dillər və ədəbiyyatlar departamentinin müəllimi, tanınmış şair və ədəbiyyatşünas, filologiya üzrə fəlsəfə doktoru Qardaşxan Haqqararın (Əzizxanlı) “Nə o - yelkən, nə bu - gəmi” adlı beşinci şeirlər kitabı “Elm və təhsil” nəşriyyatında çapdan çıxmışdır.
Məzmununa görə dörd bölümdən ibarət kitabın ilk bölümü “Dualar”da şair inam, iman və etiqadın insan mənəviyyatının saf, pak, kamil formalaşmasındakı önəmini nəzərə çatdırır və duaları ilə də buna səsləyir. “İmza yerinə rəmzi qılınc” bölümündə müəllifin öz izahına görə “Qələmə, Sözə terrora etiraz şeirləri” toplanıb. Şairin izahına əlavə olaraq qeyd edək ki, həm bu bölümdə, həm də sonrakı iki bölümdə (“Nə o - yelkən, nə bu - gəmi”, “Qafiyəsiz poeziya”) verilmiş şeirlərdə vətəndaşlıq motivləri – yurdsevərlik, qeyrət, mərdlik, cəsarət tərənnüm olunur. Və ən əsası odur ki, bütün bunları şairin qeyri-adi orijinal düşüncə tərzinin axarına düşməklə dərk etmək olar.
Şeirlər kitabının redaktoru da Xəzər Universiteti Dillər və ədəbiyyatlar departamentinin müəllimi, tanınmış ədəbi tənqidçi Ülvi Babasoydur.