2021-ci il mayın 26-da Xəzər Universitetində Dillər və ədəbiyyatlar departamentinin doktorantı Ayna Babazadənin filologiya üzrə fəlsəfə doktorluğu üçün “Əzizə Cəfərzadə nəsrində tarixi və bədii gerçəkliyin inikası” adlı dissertasiya işinin ilkin müzakirəsi keçirildi.

İclası departamentin müdiri dosent Dilbər Zeynalova açaraq, mövcud pandemiya şəraiti ilə əlaqədar olaraq əyani və onlayn şəkildə qoşulan iştirakçıları salamladı, dissertasiya işinin və onun avtoreferatının Azərbaycan Respublikasının Prezidenti yanında Ali Attestasiya Komissiyasının (AAK) fəlsəfə doktorluğu qarşısında qoyduğu tələblərə tam cavab verdiyini qeyd etdi.

Elmi Şuranın katibi Dr. Reyhan Mədətova doktorant haqqında məlumat verdi. Dissertasiya işinin əsas məzmunu, elmi müddəa və nəticələri haqqında ətraflı məlumat verən doktorant Ayna Babazadə AAK tərəfindən tövsiyə edilən ölkə dövri elmi nəşrlərində, impakt faktoruna malik istinad indeksli xarici jurnalda dərc olunan məqalələrindən, eləcə də respublika və beynəlxalq səviyyəli konfranslarda etdiyi məruzələrdən bəhs etdi.

Dissertasiya işinin ilkin müzakirəsində iki elmlər doktoru və bir fəlsəfə doktoru rəyçi olaraq çıxışlarında dissertasiya ilə bağlı müsbət rəylərini bildirdilər. Doktorantın elmi rəhbəri - AMEA Nizami Gəncəvi adına Ədəbiyyat İnstitutunun Azərbaycan-Asiya ədəbi əlaqələri şöbəsinin müdiri, filologiya elmləri doktoru, professor Bədirxan Əhmədov, yazıçı Əzizə Cəfərzadənin oğlu Turan İbrahimov və digər iştirakçılar dissertasiya işi haqqında müsbət fikirlərini söyləyərək, bəzi irad və tövsiyələrini bildirdilər.

Yekunda şura üzvləri açıq səsvermə yolu ilə irad və tovsiyələr nəzərə alınmaqla doktorant Ayna Babazadənin “Əzizə Cəfərzadə nəsrində tarixi və bədii gerçəkliyin inikası” mövzusunda 5716.01 - Azərbaycan ədəbiyyatı istiqaməti üzrə filologiya üzrə fəlsəfə doktoru dərəcəsi almaq üçün növbəti mərhələyə buraxılmasına yekdilliklə səs verdilər.