Aprelin 7-8-də Xəzər Universitetinin Psixologiya departamentinin və Xəzər Psixoloji Xidmət Mərkəzinin təşkilatçılığı ilə universitetin Mərmər salonunda Azərbaycan V Beynəlxalq Psixologiya Konfransı keçirildi. Konfransda universitetin rəhbərliyi və əməkdaşları, Türkiyə və ABŞ-dan dəvət olunmuş mütəxəssislər və yerli mütəxəssislər iştirak edirdilər.

Konfransdan əvvəl iştirakçılara Xəzər Universiteti Kamera orkestrinin ifasında qısa musiqi proqramı təqdim olundu.

Xəzər Universitetinin rektoru Dr. Hassan Niknafs konfransı açaraq, xarici mütəxəssisləri və iştirakçıları salamladı, hər il keçirilən konfransın həm yeni biliklərlə zənginləşmək, həm də təcrübə toplamaq baxımından böyük əhəmiyyətindən danışdı.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, universitetdə belə beynəlxalq elmi tədbirlərin ənənəvi olaraq mütəmadi keçirildiyini diqqətə çatdırdı, Xəzər Psixoloji Xidmət Mərkəzinin fəaliyyətindən bəhs etdi.

Konfransda Türkiyə TED Universitetindən professor Nilüfer Voltan Acarın “İnteqrativ konsultasiya modeli-Şərq ölkələri üçün psixoloji konsultasiyanın aparılma qaydaları”, Hasan Kalyoncu Universitetindən professor Mehmet Hakan Türkçaparın “Psixoterapiyada elmi yanaşma, depressiyada davranış aktivlik müalicəsi”, Hacettepe Universitetindən professor Ebru Cengel Kültürün “Məktəbəqədər yaş dövründə uşaqlarda ruhi sağlamlığın qiymətləndirilməsi meyarları, autizmin ilkin diaqnostikasının aparılma qaydaları”, İstanbul Cerrahpaşa Xəstəxanasının psixiatrı Doc. Dr. Ejder Akgün Yıldırımın “Psixodrama və onun müxtəlif tətbiq şəkilləri”, Amerikanın George Mason Universitetindən professor Frederick Bemakın “Qaçqınlıq və məcburi köçkünlüyün psixoloji təsirləri”, Wisconsin La-Crosse Universitetindən isə professor Robert Jecklinin “İctimai sağlamlıq və psixologiya” mövzularında məruzələri dinlənilərək, psixologiyanın müxtəlif sahələrinə aid müzakirələr aparıldı, suallar cavablandırıldı və qrup psixoloji terapiyasından müxtəlif nümunələr göstərildi.

Konfrans iştirakçıları psixologiya sahəsində yeni biliklər əldə etməklə yanaşı, təcrübələrini də artırdılar.

Konfransın sonunda qonaq professorlara plaketlər, iştirakçılara isə sertifikatlar təqdim edildi.

Konfrans iştirakçıları Fəxri Xiyabanda Ulu Öndər Heydər Əliyevin, Şəhidlər Xiyabanında şəhidlərin xatirəsini yad etdilər.

Tədbirin sonunda xarici qonaqlar üçün ziyafət təşkil olundu.

Konfransın gedişi AzTV kanalında və ölkə xəbər portallarında işıqlandırılmışdır:

http://www.islahat.az/azerbaycan-v-beynelxalq-psixologiya-konfransi-bas-tutdu/

http://frame.az/az%C9%99rbaycan-v-beyn%C9%99lxalq-psixologiya-konfransi-bas-tutdu/