2016-cı il aprelin 17-də KUNİB-in Bakıda keçirilən sərgisində iştirak edən Türkiyə universitetlərinin rektorları Xəzər Universitetini ziyarət etdilər. “Mərmər” salonda universitet rəhbərliyinin, dekanların, department müdirlərinin rektorlarla rəsmi görüşü keçirildi. Əvvəlcə, Mədəniyyət və incəsənət departamentinin müdiri pianoçu Zülfiyə Sadıqovanın rəhbərlik etdiyi musiqi qrupu qonaqların şərəfinə kiçik konsert verdi. Məhsəti Cabbarovanın, Elçin Feyzullayevin solo ifaları və Məsrin Rzayevanın skripkada ifası qonaqlar tərəfindən alqışlarla qarşılandı. Konsertdən sonra Xəzər Universitetinin təsisçisi, Diorektorlar və Qəyyumlar Şurasının sədri professor Hamlet İsaxanlı görüşü açaraq, Türkiyədən gələn universitet rektorlarını və qonaqları səmimi salamladı. H.İsaxanlı universitetin yaradılması və bu günə kimi olan fəaliyyəti haqqında qonaqlara geniş məlumat verdi. Sonra KUNİB-in başqanı, Ardahan Universitetinin rektoru professor Ramazan Korkmaz qonaqlar adından Hamlet İsaxanlıya və Xəzər Universitetinin rəhbərliyinə səmimi qəbul üçün dərin təşəkkürünü bildirdi. Mardin Artuklu Universitetinin rektoru professor Ahmet Ağırakça, SANKO Universitetinin rektoru professor Ahmet Sınav, Bursa Orhangazi Universitetinin rektoru professor Recep İleri və digər universitetlərin rektorları çıxış edərək, Xəzər Universitetində keçirilən səmimi, xoş görüş üçün Diorektorlar və Qəyyumlar Şurasının sədri professor Hamlet İsaxanlıya və universitet rəhbərliyinə dərin təşəkkürlərini bildirdilər.

Qonaqların şərəfinə Şirvanşah Muzey Restoranında ziyafət verildi. Xatirə şəkilləri çəkildi.