Xəzər Universitetinin İqtisadiyyat və menecment fakültəsinin I kurs tələbələri Tarix və arxeologiya departamentinin müəllimi, Dr. Yaqub Məmmədovun rəhbərliyi ilə 2026-cı il noyabrın 17-də “Azərbaycan tarixi” fənni çərçivəsində AMEA Arxeologiya və Antropologiya İnstitutunun Muzey-Sərgi Zalına və Milli Azərbaycan Tarixi Muzeyinə tədris ekskursiyasında olublar.
Muzey-Sərgi Zalında tələbələrə Azərbaycanın müxtəlif bölgələrində aparılan arxeoloji qazıntıların nəticələri, tədqiqatlar nəticəsində əldə olunmuş tapıntıların elmi əhəmiyyəti və bunların ölkənin qədim tarixinin öyrənilməsində rolu haqqında ətraflı məlumat verilib. Paleolit, neolit, eneolit, tunc və dəmir dövrlərinə aid materiallar üzərində xüsusi dayanılaraq, qədim insanların yaşayış məskənləri, əmək fəaliyyətləri, inancları və sosial münasibətləri izah edilib. Paleolit dövrü üzrə aparıcı tədqiqatçılardan olan Dr. Yaqub Məmmədov öz elmi təcrübəsini tələbələrlə bölüşərək, iştirak etdiyi arxeoloji ekspedisiyalar və son illərdə əldə edilmiş elmi nəticələrdən danışıb.
Ekskursiyanın növbəti mərhələsində tələbələr Milli Azərbaycan Tarixi Muzeyini ziyarət ediblər. Onlar muzeyin zəngin ekspozisiyası ilə tanış olaraq, Azərbaycanın qədim dövrlərdən müasir dövrədək keçdiyi tarixi inkişaf mərhələləri haqqında ətraflı məlumat alı öyrəniblər. Burada nümayiş etdirilən arxeoloji tapıntılar, numizmatik materiallar, silah nümunələri, etnoqrafik eksponatlar və tarixi sənədlər ölkəmizin çoxəsrlik maddi və mənəvi mədəniyyətini əks etdirən qiymətli nümunələr tələbələrin böyük marağına səbəb olub.
Ekskursiya zamanı Azərbaycan dövlətçilik tarixini, milli azadlıq hərəkatlarını, ictimai-siyasi prosesləri və xalqımızın zəngin mədəni irsini əks etdirən ekspozisiyalara xüsusi diqqət göstərilib. Tələbələr dərs prosesində əldə etdikləri nəzəri bilikləri muzey eksponatları vasitəsilə əyani şəkildə möhkəmləndirmək imkanı qazanıb, Azərbaycanın tarixi keçmişini daha dərindən dərk ediblər. Səfər gənclərdə tarixi-mədəni irsə marağın artırılması və milli-mənəvi dəyərlərin təbliği baxımından da əhəmiyyətli olub.