Xəzər Universitetinin Kitabxana-İnformasiya Mərkəzinin təşkilatçılığı ilə 2026- cı il noyabrın 6- da Hasvet Baytarlıq təbabəti fakültəsində  Zəfər Gününə həsr olunmuş “Zəfərin şahidləri: tarixdən gələcəyə” adlı tədbir keçirilib.

Tədbiri giriş sözü ilə Hasvet Baytarlıq təbabəti fakültəsinin Baytarlıq təbabəti şöbəsinin müdiri Səbinə Məmmədova açaraq, iştirakçıları salamlayıb və sözü Kitabxana-İnformasiya Mərkəzinin direktoru Aytac Misgərliyə verib.

Aytac Misgərli çıxışında tədbirin əsas məqsədinin Zəfər tariximizin gənc nəslə çatdırılması, Vətən müharibəsi iştirakçılarının keçdiyi şərəfli döyüş yolunun xatırlanması və tarixi yaddaşın qorunması olduğunu vurğulayıb. O, Zəfər Gününün tarixi əhəmiyyətindən danışaraq, tədbirin qonağı – 44 günlük Vətən müharibəsinin iştirakçısı, ehtiyatda olan mayor, yazıçı  Mahir Hüseyn haqqında iştirakçılara məlumat verib.

Sonra tədbir iştirakçıları Mahir Hüseynin həyat və döyüş yoluna həsr olunmuş videoçarxa baxıblar.

Videoçarxın nümayişindən sonra Aytac Misgərli qonağı səhnəyə dəvət edib. Tədbir ənənəvi çıxış formatından fərqli olaraq, müsahibə və səmimi söhbət şəklində davam edib.  Aytac Misgərli qonağa ünvanladığı suallarla onun müharibə dövründə yaşadığı hadisələrə, döyüş meydanında qarşılaşdığı çətinliklərə, əsgər və zabitlərimizin qəhrəmanlığına, xalqımızın birliyinə və tarixi Qələbənin qazanılmasına aparan yola aydınlıq gətirib. Mahir Hüseyn  isə canlı şahidi olduğu hadisələri, şəxsi təcrübəsini və xatirələrini iştirakçılarla bölüşüb.

Görüş universitet əməkdaşlarının və tələbələrin də müzakirəyə qoşulması ilə daha  maraqlı və interaktiv xarakter alıb.

Səmimi söhbət və fikir mübadiləsi şəraitində keçən tədbir iştirakçılarda böyük maraq doğurub. Görüş bir daha nümayiş etdirib ki, Zəfər tariximizin canlı şahidlərinin xatirələri gələcək nəsillərin vətənpərvərlik ruhunda yetişməsində, milli yaddaşın qorunmasında və tarixi Qələbəmizin əhəmiyyətinin dərindən dərk edilməsində mühüm rol oynayır.