Xəzər Universitetinin Humanitar, təhsil və sosial elmlər fakültəsinin xarici dil müəllimliyi ixtisası üzrə IV kurs tələbələri British Council tərəfindən təşkil olunan Online Teacher Community (OTC) proqramında iştirak edirlər.

8 həftə davam edəcək və 28 saatlıq tədrisi əhatə edən proqram gələcək ingilis dili müəllimlərinin peşəkar inkişafına, müasir tədris yanaşmaları ilə tanış olmalarına və pedaqoji biliklərini praktikada tətbiq etmələrinə imkan yaradacaq.

Layihə çərçivəsində ilk məlumatlandırma sessiyası 23 oktyabrda keçirilib. Sessiya British Council-in əməkdaşları Könül Əhmədova və Şirin Soyos tərəfindən aparılıb. 

Proqram çərçivəsində iştirakçılar dərs planlaşdırılması, sinfin idarə olunması və öyrənmənin qiymətləndirilməsi istiqamətləri üzrə bilik və bacarıqlarını inkişaf etdirəcəklər. Təlimlər özünütədris modulları, onlayn müzakirələr, canlı Zoom görüşləri və vebinarlar vasitəsilə həyata keçiriləcək.

Proqram tələbələrə universitetdə əldə etdikləri nəzəri bilikləri praktik təcrübə ilə əlaqələndirmək, digər gələcək müəllimlərlə fikir mübadiləsi aparmaq və peşəkar inkişaflarını davam etdirmək imkanı verir.

Xəzər Universiteti tələbələrinin bu proqramda iştirakı onların gələcək pedaqoji fəaliyyətə hazırlanması və beynəlxalq təcrübə əsasında peşəkar bacarıqlarının inkişafı baxımından əhəmiyyətlidir.