Azərbaycan Dövlət Pedaqoji Universiteti (ADPU) ilə ABŞ-nin Corc Vaşinqton Universiteti (George Washington University) arasında həyata keçirilən beynəlxalq ikili diplom magistr proqramının I və II kurs tələbələri 2026- cı il oktyabrın 27- də  Xəzər Universitetində olublar.

Görüşdə Xəzər Universitetinin rektoru Dr. Raziyə İsayeva, ikili diplom proqramının rəhbəri Tofiq Əhmədov və tələbələr iştirak ediblər.

Görüş çərçivəsində Dr. Raziyə  İsayeva  tələbələrə Xəzər Universiteti haqqında təqdimat edərək, ətraflı məlumat verib. O, həmçinin, universitet idarəçiliyi sahəsində təcrübəsini bölüşərək, liderlik prinsipləri, strateji düşüncə, qərarvermə və müasir ali təhsil müəssisələrinin idarə olunmasının xüsusiyyətlərindən danışıb.

İnteraktiv formatda keçirilən təqdimat zamanı tələbələr onları maraqlandıran sualları ünvanlayıb, müzakirələrdə fəal iştirak edib və universitetin akademik mühiti ilə yaxından tanış olublar.

Qeyd edək ki, ADPU və Corc Vaşinqton Universitetinin ikili diplom proqramı təhsil və insan inkişafı sahəsində müasir biliklərə və idarəetmə bacarıqlarına malik mütəxəssislərin hazırlanmasına xidmət edir. Proqram iştirakçılara beynəlxalq akademik təcrübə qazanmaq, təhsil siyasəti və idarəetməsi sahəsində biliklərini inkişaf etdirmək imkanı yaradır.