Xəzər Universitetinin Karyera və Məzunlar Mərkəzi məzunlarla davamlı əlaqələrin qurulmasına, onların peşəkar inkişafının dəstəklənməsinə və beynəlxalq karyera imkanlarına çıxışının genişləndirilməsinə xüsusi önəm verir. Mərkəzin işəgötürənlərlə əməkdaşlığı və məzunlarla qurduğu əlaqələr bu istiqamətdə yeni imkanların yaranmasına xidmət edir.
Bu çərçivədə, Yunanıstanın Rodos adasında 2027-ci ilin yazında fəaliyyətə başlaması planlaşdırılan beşulduzlu Avelia MGallery Rhodes hotelində müxtəlif vəzifələr üzrə vakansiyalar ilkin mərhələdə Xəzər Universitetinin məzunlarına təqdim olunub. Təşəbbüsün növbəti mərhələsində namizədlərlə üzbəüz müsahibələrin keçirilməsi məqsədilə hotelin nümayəndə heyəti Bakıya səfər edib.
2026-cı il oktyabrın 13- də Sapphire Inn Hoteldə keçirilən müsahibələrdə Xəzər Universitetinin məzunları iştirak ediblər. Müsahibələrdə hotelin İdarə Heyətinin üzvü Roula Soulunia, İnsan Resursları üzrə direktoru Anca Cucu və Xəzər Universitetinin məzunu, hotelin açılışöncəsi əməliyyatlar komandasının üzvü Aynurə Musayeva iştirak ediblər.
Front Office & Guest Relations, Food & Beverage və Spa istiqamətləri üzrə vakansiyalar məzunlara beynəlxalq hotelçilik sektorunda karyera qurmaq, beynəlxalq iş mühitində təcrübə qazanmaq və peşəkar bacarıqlarını inkişaf etdirmək imkanı yaradır.
Bu təşəbbüs Karyera və Məzunlar Mərkəzinin məzunlarla əməkdaşlığının, onların karyera ehtiyaclarına uyğun imkanların müəyyənləşdirilməsinin və universitet– işəgötürən– məzun əlaqələrinin inkişaf etdirilməsinin əhəmiyyətini nümayiş etdirir.
Xəzər Universitetinin Karyera və Məzunlar Mərkəzi məzunlarla əlaqələri möhkəmləndirməyə, işəgötürənlərlə əməkdaşlığı genişləndirməyə və məzunların yerli və beynəlxalq əmək bazarında rəqabət qabiliyyətini artırmağa yönəlmiş təşəbbüslərini davam etdirir.