Xəzər Universitetinin Tarix və arxeologiya departamentinin müdiri, Türk İslam Araşdırmaları Mərkəzinin sədri Telman Nüsrətoğlu 2026-cı il oktyabrın 2- də  Azərbaycan-Türkiyə strateji müttəfiqliyinin regional və beynəlxalq əhəmiyyəti, iki ölkə arasında iqtisadi və siyasi əməkdaşlığın perspektivləri, həmçinin, Türk dünyasının gücünün artırılmasında bu əməkdaşlığın rolu barədə AZƏRTAC-a müsahibə verib.

Müsahibəsində Telman Nüsrətoğlu bildirib ki, Azərbaycan ilə Türkiyə arasında strateji müttəfiqlik yalnız ikitərəfli münasibətlərlə məhdudlaşmır, eyni zamanda, Türk dünyasının iqtisadi, siyasi və geosiyasi mövqeyinin möhkəmləndirilməsinə mühüm töhfə verir.

O, iki ölkə arasında iqtisadi əməkdaşlığın yeni istiqamətlər üzrə inkişaf etdirilməsinin vacibliyini vurğulayıb. Rəqəmsal ticarət, yüksək texnologiyalı məhsulların birgə istehsalı, sənaye, yaşıl enerji və kənd təsərrüfatı sahələrində ortaq layihələrin həyata keçirilməsini prioritet istiqamətlər kimi qeyd edib.

Telman Nüsrətoğlu Azərbaycanın işğaldan azad edilmiş ərazilərində Türkiyə şirkətlərinin iştirakının da xüsusi əhəmiyyət daşıdığını bildirib. Onun sözlərinə görə, bu əməkdaşlıq regionda yeni infrastrukturun qurulması, istehsal müəssisələrinin yaradılması, müasir texnologiyaların tətbiqi və məşğulluğun artırılması baxımından mühüm imkanlar yaradır.

Müsahibədə Azərbaycan-Türkiyə əməkdaşlığının əsas istiqamətlərindən biri kimi Orta Dəhlizin inkişafına da toxunulub. Telman Nüsrətoğlu Azərbaycanın Şərq ilə Qərb arasında mühüm nəqliyyat qovşağı kimi mövqeyinin və Türkiyənin Avropa bazarlarına çıxış imkanlarının bu marşrutun əhəmiyyətini artırdığını qeyd edib.

O, həmçinin, Zəngəzur dəhlizinin perspektivlərinin geniş regional kontekstdə qiymətləndirilməsinin vacibliyini vurğulayıb. Bildirib ki, nəqliyyat bağlantılarının inkişafı Azərbaycan və Türkiyə ilə yanaşı, Mərkəzi Asiya ölkələri və digər türk dövlətləri üçün də yeni ticarət və logistika imkanları yarada bilər.

Telman Nüsrətoğlu müdafiə sənayesi və təhlükəsizlik sahələrində əməkdaşlığın da Azərbaycan-Türkiyə strateji müttəfiqliyinin mühüm istiqamətlərindən biri olduğunu diqqətə çatdırıb. Onun sözlərinə görə, birgə istehsal layihələri, texnologiya mübadiləsi və sənaye potensialının birləşdirilməsi iki ölkənin müdafiə imkanlarının inkişafına xidmət edir.

Müsahibənin tam mətnini AZƏRTAC-ın materialında oxumaq mümkündür.