Xəzər Universitetinin Humanitar, təhsil və sosial elmlər fakültəsinin Tarix müəllimliyi ixtisası üzrə II kurs tələbələri üçün “Qədim dünya tarixi I” fənnindən, eləcə də Tarix-coğrafiya müəllimliyi ixtisası üzrə I kurs tələbələri üçün “Arxeologiya və Etnoqrafiyanın əsasları” fənnindən növbəti mühazirə dərsləri 2026-cı il oktyabrın 1- də AMEA-nın Arxeologiya və Antropologiya İnstitutunun Muzey-sərgi zalında keçirilib.

Fənn müəllimi Orxan Zamanovun təşkilatçılığı ilə keçirilən dərslər zamanı tələbələr muzeydə nümayiş etdirilən müxtəlif arxeoloji materiallar və maddi-mədəniyyət nümunələri ilə yaxından tanış olublar. Eksponatlar əsasında qədim insanların həyat tərzi, məişəti, təsərrüfat fəaliyyəti, əmək alətləri və mədəni inkişafı haqqında ətraflı məlumat verilib. Eyni zamanda, arxeoloji materialların qədim dünya tarixinin öyrənilməsində elmi və mənbəşünaslıq əhəmiyyəti xüsusi vurğulanıb.

Dərs çərçivəsində aparılan müzakirələr və əyani müşahidələr tələbələrə auditoriyada əldə etdikləri nəzəri bilikləri konkret arxeoloji materiallar və eksponatlarla əlaqələndirmək, eləcə də gələcək peşə fəaliyyətləri üçün praktik bilik və bacarıq formalaşdırmaq imkanı yaradıb.

Qeyd edək ki, Xəzər Universitetində tarix və tarix müəllimliyi ixtisasları üzrə təhsil alan tələbələrin muzey və sərgi zallarında təşkil olunan dərslərə cəlb edilməsi onların nəzəri biliklərinin praktik müşahidələrlə tamamlanmasına, tarix və arxeologiya elmlərinə daha yaxından bələd olmalarına və peşə hazırlığının gücləndirilməsinə xidmət edir.