Azərbaycanda müasir baytarlıq təbabəti üzrə peşəkar kadr hazırlığı və heyvan sağlamlığının qorunması istiqamətində yeni təhsil modelləri tətbiq olunur. Xəzər Universitetinin Türkiyənin "Hasvet" şirkəti ilə əməkdaşlığı əsasında yaradılmış HASVET Baytarlıq təbabəti fakültəsi də bu istiqamətdə fəaliyyət göstərir. Fakültənin dekanı Çiçək Əliyeva AZƏRTAC -a müsahibəsində baytar həkimlərinin zoonoz xəstəliklərin qarşısının alınmasında rolu və bu sahədə kadr hazırlığı məsələləri ilə bağlı məlumat verib. Müsahibəni təqdim edirik.
- Fakültənin yaradılmasında əsas məqsəd nədir və onun digər baytarlıq fakültələrindən fərqi nədir?
- HASVET Baytarlıq təbabəti fakültəsi otən il Xəzər Universiteti ilə Türkiyənin "Hasvet" şirkəti arasında imzalanmış müqavilə əsasında təsis edilib. Kampusumuz geniş auditoriyalara, müasir laboratoriyalara və klinik imkanlara malikdir. Bu fakültənin yaradılması ölkəmizdə müasir baytarlıq təbabəti təhsilinin inkişaf etdirilməsinə, eyni zamanda, dövlətimizin kənd təsərrüfatına, heyvandarlığa və ərzaq təhlükəsizliyinə yönəlmiş siyasətinə dəstək baxımından mühüm addımlardan biridir və akademik töhfə kimi qiymətləndirilməlidir.
HASVET Baytarlıq təbabəti fakültəsinin digər fakültələrdən fərqi ondadır ki, bu qurum Azərbaycanda ilk olaraq akademik fəaliyyət göstərən bir təhsil müəssisəsi ilə sənaye sahəsində praktiki biliklərə sahib böyük bir şirkətin işbirliyi nəticəsində formalaşıb. Eyni zamanda, Azərbaycan-Türkiyə qardaşlığının bariz nümunəsi kimi yaradılmış yeni tədris modelinin və təhsil proqramının inteqrasiyasını təcəssüm etdirir. Fakültəmizi fərqləndirən əsas amil akademiya ilə sənaye inteqrasiyasını özündə birləşdirən müasir təhsil modelinin tətbiqidir.
- Son illərdə heyvan xəstəliklərinin, xüsusilə zoonoz xəstəliklərinin qarşısının alınmasında baytar həkimlərinin rolu necə dəyişib?
- Günümüzdə baytar həkimlərinin cəmiyyətdəki məsuliyyəti və funksiyaları daha da artıb. Buna təsir edən əsas amillərdən biri Ümumdünya Səhiyyə Təşkilatının yayımladığı son statistik məlumatlardır. Hazırda insanlar arasında yayılan xəstəliklərin 65 faizindən çoxu məhz zoonoz xəstəliklərin payına düşür.
Zoonoz xəstəliklər heyvanlardan heyvanlara və heyvanlardan insanlara keçmə xüsusiyyətinə malikdir. Bu səbəbdən "Vahid sağlamlıq" konsepsiyasını göz önünə gətirərək demək olar ki, baytar həkimlərinin insan sağlamlığının qorunmasındakı rolunun önəmi bir daha sübut olunur. Bu da baytar həkimlərinin məsuliyyətini artıraraq qida təhlükəsizliyinin və ictimai səhiyyənin qorunmasında, eləcə də ətraf mühit və heyvanların sağlamlığının təmin edilməsində onları əsas ixtisas sahiblərinə çevirmişdir.
- Baytarlıq sahəsində kadr hazırlığı ilə bağlı hansı problemlər var və fakültənizdə bu məsələ necə həll olunur?
- Fakültə üzrə ən çox rastlaşdığımız problem hazırda ölkə miqyasında da gündəmdə olan kadr potensialının çatışmazlığıdır. Məhz baytarlıq ixtisası üzrə pedaqoji kadrların azlığı tədris sistemində müəyyən çətinliklər yaradır.
Prezident İlham Əliyevin kənd təsərrüfatının inkişafına və müasir peşəkar kadr hazırlığına göstərdiyi diqqət bizi daha da məsuliyyətli olmağa yönəldir. Dövlət Proqramı çərçivəsində xaricdə təhsil alıb ölkəyə qayıdan gənc mütəxəssislərimizi tədris prosesinə cəlb edərək bu kadr problemini qısa zamanda aradan qaldırmağa çalışırıq.

https://www.kalibri.az/viewhr.php?z=4&ids=433420946&lng=az_az&m=1&c=MzMz