SUMI-də gənc mühəndislərin peşəkar inkişafına və neft-qaz sənayesi üzrə praktiki biliklərinin artırılmasına yönəlmiş “Engineering Bootcamp” proqramı uğurla başa çatıb.

2026-cı il 3 avqust – 2 sentyabr aralığında keçirilən biraylıq proqramda Azərbaycan Dövlət Neft və Sənaye Universiteti, Bakı Ali Neft Məktəbi, UFAZ və Xəzər Universitetindən ümumilikdə 20 tələbə iştirak edib.

Proqram çərçivəsində iştirakçılar neft-qaz sənayesinin aktual istiqamətləri üzrə nəzəri və praktiki biliklər əldə edib, SUMI-nin müxtəlif funksiyaları və iş prosesləri ilə yaxından tanış olublar. Təlim sessiyaları və mentor görüşləri iştirakçılara real iş mühitini yaxından tanımaq, sahə üzrə mütəxəssislərin təcrübəsindən faydalanmaq və peşəkar bacarıqlarını inkişaf etdirmək imkanı yaradıb.

Proqramın mentorları Ayaz Əmirov, Emil İsmayılzadə, Ümid Şıxməmmədov və Gündüz Mahmudov iştirakçılarla öz peşəkar təcrübələrini bölüşərək, onların inkişafına dəstək olublar.

Proqramın yekun mərhələsində iştirakçılar qazandıqları bilik və təcrübələr əsasında layihələr hazırlayaraq, təqdimatlarını ediblər. “Engineering Bootcamp” gənc mütəxəssislərin neft-qaz sənayesinə dair biliklərinin möhkəmləndirilməsi və gələcək peşəkar inkişaflarına töhfə verilməsi baxımından əhəmiyyətli platforma olub.