Xəzər Universitetinin Tarix və arxeologiya departamentinin müdiri, dosent Telman Nüsrətoğlu Özbəkistanın Andican şəhərində səfərdə olub.

Səfər çərçivəsində T. Nüsrətoğlu Andican şəhərində yerləşən Kokand Universitetində forumda məruzə ilə çıxış edib. Məruzənin təqdimatından sonra Özbəkistanın müxtəlif ali təhsil müəssisələri ilə görüşlər davam etdirilib.

Səfərin növbəti mərhələsində Telman Nüsrətoğlu İqtisadiyyat və Pedaqogika Universitetini ziyarət edib. Görüş zamanı universitetin müəllim və tələbələri ilə fikir mübadiləsi aparılıb. Görüşlərdə Azərbaycan–Özbəkistan qardaşlığı, Türk dünyasının birliyi, xalqlarımızın ortaq tarixi, milli kökləri, Azərbaycan və Özbəkistanı bir-birinə bağlayan mənəvi dəyərlər haqqında geniş müzakirələr aparılıb. Görüş zamanı Özbəkistanda gənc nəslin Türk dünyasının ortaq tarixinə, milli-mənəvi dəyərlərə və qardaş xalqlar arasındakı əlaqələrə göstərdiyi marağın əhəmiyyəti xüsusi vurğulanıb.

Telman Nüsrətoğlu göstərilən səmimi qəbula və görüşün yüksək səviyyədə təşkilinə görə, universitet rəhbərliyinə təşəkkürünü bildirib.

Səfər çərçivəsində keçirilən görüşlərin Azərbaycan və Özbəkistan, eləcə də iki ölkənin ali təhsil və elmi ictimaiyyəti arasında əlaqələrin inkişafına töhfə verəcəyi qeyd olunub.