Xəzər Universitetində 2026- cı il 8- 12 sentyabr  aralığında keçirilən “KOYA 10” Bakı sessiyası çərçivəsində universitetin əməkdaşı, Direktorlar və Qəyyumlar Şurası sədrinin köməkçisi Dilarə Məstəliyevanın “Ayrıldığım şəhər, döndüyüm şəhər — Bir paytaxtın dəyişən üzü ilə yenidən qarşılaşmaq” mövzusunda təqdimatı olub.

Bakıda doğulub - böyüyən və uzun illər İstanbulda yaşadıqdan sonra doğma şəhərinə qayıdan Dilarə Məstəliyeva təqdimatında Bakının keçmişdən bu günə keçdiyi dəyişikliklərə şəxsi müşahidələri əsasında nəzər salıb.

Təqdimatda şəhərin memarlıq simasının, ictimai məkanlarının və şəhər həyatının transformasiyasından bəhs edilib, “Yeni Bakı köhnə Bakının davamıdır, yoxsa artıq başqa bir şəhərdir?” sualı ətrafında maraqlı fikir mübadiləsi aparılıb.

Təqdimatın xüsusi məqamlarından biri Dilarə Məstəliyevanın uşaqlıq və məktəb illərinin keçdiyi Balaxanı qəsəbəsinin son illərdəki inkişafından  bəhs etməsi və “KOYA 10” çərçivəsində iştirakçıların bu qəsəbəyə təşkil olunan ekskursiya zamanı onun tarixi və müasir siması ilə yaxından tanışlıqları olub. Səfər “KOYA” iştirakçıları üçün böyük maraq doğuraraq, onlarda xoş təəssüratlar yaradıb.

Təqdimat iştirakçılar tərəfindən maraqla qarşılanıb. Dilarə Məstəliyevanın “KOYA” çərçivəsində növbəti çıxışının 2026- cı il  2–7 oktyabrda keçiriləcək “KOYA 11” Bakı sessiyasında olması nəzərdə tutulur.