Türkiyənin Bilkənd Universitetinin professoru Dr. Yağub Heydərzadə 23–30 avqust tarixlərində Xəzər Universitetinin Nəzəri Fizika Mərkəzinin qonağı olub.

Səfər çərçivəsində, avqustun 26-da Dr. Yağub Heydərzadə Nəzəri Fizika Mərkəzində “The Dance of Two FLRW Universes: A Possible Geometric Origin of Cosmic Inhomogeneities” (“İki FLRW kainatının rəqsi: kosmik qeyri-bircinsliklərin mümkün həndəsi mənşəyi”) mövzusunda seminarla çıxış edib.

Məruzədə müasir kosmologiyanın mühüm problemlərindən biri olan kainatın böyük və kiçik miqyaslarda quruluşu müzakirə olunub. Professor Friedmann–Lemaître–Robertson–Walker (FLRW) həndəsəsinin kainatın böyük miqyaslı strukturunu uğurla təsvir etdiyini, lakin müşahidə olunan kainatın daha kiçik miqyaslarda yüksək dərəcədə qeyri-bircins olduğunu qeyd edib.

Seminar zamanı kosmik qeyri-bircinsliklərin ilkin homogen FLRW fonuna perturbasiya kimi əlavə edilmədən, dəqiq və tam qeyri-xətti həndəsi quruluş əsasında yaranması imkanları təqdim olunub. Dr. Yağub Heydərzadə Eynşteyn–Maksvel tənliklərinin ideal maye və kosmoloji sabitlə birlikdə dəqiq sferik simmetrik həllərindən bəhs edib.

Təqdim olunan nəticələr göstərib ki, müəyyən həndəsi quruluş nəticəsində fəza-zaman məkan homogenliyini itirir və enerji sıxlığı, təzyiq və əyrilik invariantları radial asılılıq əldə edir. Maraqlı məqam ondan ibarətdir ki, bu qeyri-bircinsliklər hər biri ayrıca homogen olan həndəsi strukturların qarşılıqlı əlaqəsi nəticəsində meydana gələ bilər.

Seminar Nəzəri Fizika Mərkəzinin tələbə və tədqiqatçılarının böyük marağına səbəb olub. Məruzədən sonra mövzu ətrafında geniş elmi müzakirələr aparılıb və iştirakçıların sualları cavablandırılıb.

Dr. Yağub Heydərzadənin Xəzər Universitetinə səfəri Nəzəri Fizika Mərkəzinin beynəlxalq elmi əməkdaşlığının inkişafı və nəzəri fizika sahəsində elmi əlaqələrin genişləndirilməsi baxımından mühüm əhəmiyyət daşıyır.