Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il avqustun 13-də “Sonxeber.az” xəbər portalına müsahibə verib. O, insanların getdikcə daha az səmimi ünsiyyət qurmasının səbəbləri, rəqəmsal texnologiyaların təsiri və səmərəli ünsiyyətin yolları barədə fikirlərini bölüşüb.

Psixoloq bildirib ki, telefon, sosial şəbəkələr və onlayn platformalar ünsiyyət imkanlarını artırsa da, real və emosional ünsiyyətin azalmasına səbəb ola bilir. Onun sözlərinə görə, zaman çatışmazlığı, xroniki stress və emosional tükənmə də insanların ünsiyyəti əlavə yük kimi qəbul etməsinə gətirib çıxarır.

Mirsadiq Muxtarov qeyd edib ki, rədd edilmək, yanlış anlaşılmaq və tənqid olunmaq qorxusu insanları emosional məsafə saxlamağa sövq edə bilər. O, həmçinin, sosial müqayisə və mükəmməllik gözləntisinin ünsiyyətə mənfi təsir göstərdiyini vurğulayıb. Psixoloq səmərəli ünsiyyət üçün aktiv dinləmə və empatiyanın vacibliyini qeyd edib. Onun sözlərinə görə, qarşı tərəfin sözünü kəsməmək, suallar vermək, həqiqətən dinləmək və hisslərini anlamağa çalışmaq sağlam ünsiyyətin əsas şərtlərindəndir. Telefon və digər elektron vasitələrdən daha şüurlu istifadə etmək, yaxın insanlarla keyfiyyətli söhbətlərə vaxt ayırmaq da münasibətləri möhkəmləndirir.

Psixoloq vurğulayıb ki, tək qalmaq hər zaman problem deyil. Sosial təcrid insanın seçimi olmadıqda və həyat keyfiyyətinə mənfi təsir göstərdikdə isə diqqət tələb edir. Onun sözlərinə görə, ünsiyyət yalnız informasiya mübadiləsi deyil, həm də eşidilmək və anlaşılmaq ehtiyacıdır.

Müsahibənin tam versiyası aşağıdakı linkdə:

https://sonxeber.az/402207/insanlar-niye-getdikce-daha-az-unsiyyet-qurur-semereli-unsiyyeti-engelleyen-faktorlar-hansilardir-ve-onlari-nece-asmaq-olar-musahibe