Xəzər Universitetinin rektoru Dr. Raziyə İsayeva 2026- cı il iyulun 17- də  “IT SkillSprint” proqramının bağlanış mərasimində iştirak edib.

Xəzər Universitetinin “Kompüter elmləri”, “Kompüter mühəndisliyi”, “İnformasiya təhlükəsizliyi” istiqamətləri üzrə təhsil alan 14 tələbəsi beynəlxalq səviyyəli intensiv “IT SkillSprint” təhsil proqramını uğurla başa vuraraq, məzun olub.

Proqram Azərbaycan Respublikasının İnnovasiya və Rəqəmsal İnkişaf Agentliyi (İRİA), Elm və Ali Təhsil üzrə Dövlət Agentliyi (EATDA) və beynəlxalq texnologiya təhsili şirkəti Ironhack tərəfindən həyata keçirilib. Layihənin əsas məqsədi rəqəmsal iqtisadiyyatın tələblərinə uyğun, informasiya texnologiyaları sahəsində beynəlxalq səviyyədə rəqabətqabiliyyətli insan kapitalının hazırlanmasına töhfə verməkdir.

Altı ay davam edən proqram çərçivəsində tələbələr Data & AI, Cybersecurity & AI, Web Development & AI və DevOps & AI istiqamətləri üzrə hibrid formatda intensiv təlimlərdə iştirak ediblər. “Bootcamp” modeli əsasında təşkil olunan tədris müddətində iştirakçılar beynəlxalq ekspert və mentorlarla çalışaraq, real layihələr üzərində praktiki təcrübə qazanıb, hakatonlarda iştirak edib, peşəkar portfel formalaşdırıb, karyera sərgiləri və şəbəkələşmə tədbirlərinə qoşulublar.

Rektor Dr. R. İsayeva proqramı uğurla başa vuran universitet tələbələrini təbrik edib, onlarla görüşərək xatirə şəkilləri çəkdirib və bu beynəlxalq səviyyəli təşəbbüsdə qazandıqları bilik və bacarıqların gələcək peşəkar fəaliyyətlərində mühüm rol oynayacağına əminliyini bildirib.

Bağlanış mərasimində Rəqəmsal İnkişaf və Nəqliyyat nazirinin müavini Rəşad Həsənov, Elm və Təhsil nazirinin müavini Həsən Həsənli, eləcə də layihənin beynəlxalq tərəfdaşı olan Ironhack şirkətinin direktoru Gonzalo Manrique Sabatel çıxış ediblər. Çıxışlarda proqramın ali təhsil ilə əmək bazarı arasında səmərəli əməkdaşlıq modeli formalaşdırdığı, tələbələrin həm yerli, həm də beynəlxalq əmək bazarında rəqabətqabiliyyətli mütəxəssis kimi yetişməsinə mühüm töhfə verdiyi vurğulanıb.

 “IT SkillSprint” proqramının ilk mərhələsində ölkənin 9 ali təhsil müəssisəsindən ümumilikdə 120 tələbə məzun olub.