Xəzər Universitetinin rektoru Dr. Raziyə  İsayeva 2026- cı il iyulun 11- də  Azərbaycan Respublikası Müdafiə Sənayesi Nazirliyi və Elm və Təhsil Nazirliyinin birgə əməkdaşlığı çərçivəsində həyata keçirilən “Mühəndis Hazırlığı və Müdafiə Sənayesi Ekosisteminin İnkişaf Proqramı”nın 2025–2026-cı tədris ili üzrə Hesabat və Məzun Günü” tədbirində iştirak edib.Açılış mərasimində Azərbaycan Respublikasının Müdafiə Sənayesi naziri Vüqar Mustafayev çıxış edərək, proqramın ölkənin müdafiə sənayesi üçün yüksəkixtisaslı mühəndis kadrlarının hazırlanmasında, universitet - sənaye əməkdaşlığının genişləndirilməsində və insan kapitalının inkişafında əhəmiyyətini vurğulayıb.Tədbir çərçivəsində “İxtisaslaşmış Akademik Tədris Proqramı”nın icrasına dəstək verən ali təhsil müəssisələrinin rəhbərləri təltif olunublar. Xəzər Universitetinin rektoru Dr. Raziyə İsayeva proqrama  göstərdiyi dəstəyə, müdafiə sənayesi üçün ixtisaslı kadrların hazırlanmasına və insan kapitalının inkişafına verdiyi töhfəyə görə, Müdafiə Sənayesi naziri Vüqar Mustafayev tərəfindən təşəkkürnamə ilə təltif olunub. Bu mükafat Xəzər Universitetinin mühəndislik təhsilinin inkişafı, sənaye ilə əməkdaşlığın gücləndirilməsi və ölkənin prioritet sahələri üçün rəqabətqabiliyyətli mütəxəssislərin hazırlanmasına verdiyi dəstəyin yüksək qiymətləndirilməsinin göstəricisidir.