Xəzər Universitetinin Təbiət elmləri və mühəndislik fakültəsinin Elektrik və elektronika mühəndisliyi ixtisasının III kurs tələbəsi Tural Şaban Azərbaycan Respublikası Müdafiə Sənayesi Nazirliyi və Elm və Təhsil Nazirliyinin birgə əməkdaşlığı çərçivəsində həyata keçirilən “Mühəndis Hazırlığı və Müdafiə Sənayesi Ekosisteminin İnkişaf Proqramı” üzrə  təşkil olunan “İxtisaslaşmış Akademik Tədris Proqramı”nı uğurla başa vuraraq, 2026- cı il iyulun 11- də  “Fərqlənmə Sertifikatı” ilə təltif edilib.

Ölkə üzrə 750-dən çox müraciət arasından seçilən cəmi 70 tələbənin iştirak etdiyi proqram mühəndisliyin müxtəlif istiqamətlərini – elektronika, mexanika, PCB dizaynı, süni intellekt və daxili sistemlər sahələrini əhatə edib. Tural Şaban elektronika istiqaməti üzrə müraciət edərək, proqrama qəbul olunan  tələbələrdən biri olub.

2026-cı il 16 fevral- 15 iyun aralığını əhatə edən nəzəri və praktiki tədris müddətində iştirakçılara elektron sxemlərin layihələndirilməsi və hazırlanması üzrə praktiki tapşırıqlar təqdim olunub. Proqram çərçivəsində tələbələrə 22 elektron dövrənin qurulması tapşırılıb.

Tural Şaban təqdim olunan bütün 22 elektron dövrənin hazırlanmasını tam şəkildə yekunlaşdıraraq, proqramın ən yüksək nəticə göstərən iştirakçıları sırasında yer alıb. Bu uğuruna görə o, Azərbaycan Respublikası Müdafiə Sənayesi nazirinin müavini Hidayət Əzimovun imzası ilə təsdiq olunmuş “Fərqlənmə Sertifikatı”na layiq görülüb.

Xəzər Universiteti tələbəsinin bu nailiyyəti onun elektronika və müasir mühəndislik sahəsində əldə etdiyi bilik və bacarıqların, eləcə də praktiki layihələrdə fəal iştirakının göstəricisidir. Universitet tələbələrinin sənaye yönümlü proqramlarda iştirakı gələcək mühəndislərin peşəkar hazırlığının inkişafına mühüm töhfə verir.