Türkiyənin Bayburt şəhərində Bayburt Valiliyi, Bayburt Bələdiyyəsi və Bayburt Universitetinin birgə təşkilatçılığı ilə 2026 – cı il 6 – 9 iyulda  30-cu Beynəlxalq Dədə Qorqud Simpoziumu keçirilib.

Simpoziuma Türk dünyasından gələn universitet rektorları, millət vəkilləri və alimlərlə birlikdə Xəzər Universiteti Tarix və arxeologiya departamentinin müdiri, dosent Telman Nüsrətoğlu da  qatılıb. Tədbir çərçivəsində təşkil olunan elmi və mədəni proqramlarda fəal iştirak edən dosent Telman Nüsrətoğlu "Türk dünyasının mənəvi, siyasi və tarixi birliyinin formalaşmasında böyük tarixi şəxsiyyətlərin rolu" mövzusunda geniş məruzə ilə çıxış edib.

Məruzədə Dədə Qorqud irsinin türk xalqlarını ortaq tarix, mədəniyyət və mənəvi dəyərlər ətrafında birləşdirən əhəmiyyəti vurğulanıb, eyni zamanda, tarix boyu Türk dünyasının siyasi və mənəvi həmrəyliyinin möhkəmlənməsində görkəmli tarixi şəxsiyyətlərin xidmətləri elmi faktlar əsasında təhlil olunub.

Qeyd edək ki, Beynəlxalq Dədə Qorqud Simpoziumu Türk dünyasının ortaq tarixi, dili, mədəniyyəti,  mənəvi irsinin öyrənilməsi və təbliği baxımından nüfuzlu elmi platformalardan biri hesab olunur.