Xəzər Universitetində Məktəbəqədər və Ümumi Təhsil üzrə Dövlət Agentliyi (MÜTDA), Ağ Yelkən Gənclik bağçalar şəbəkəsi və Xəzər Universitetinin birgə təşkilatçılığı ilə 2026 – cı il iyulun 4 – də  “Məktəbəqədər Təhsildə Peşəkar Refleksiv Emalatxana” layihəsinin ilk sessiyası keçirilib. "Azyaşlı uşaqların inkişafı və təhsili" mövzusuna həsr olunan tədbir ölkənin müxtəlif bölgələrindən 140 məktəbəqədər təhsil müəssisəsində çalışan mütəxəssisi bir araya gətirib.

Tədbirin açılışında Xəzər Universitetinin rektoru Dr. Raziyə İsayeva iştirakçıları salamlayaraq məktəbəqədər təhsildə peşəkar inkişafın, reflektiv düşüncə mədəniyyətinin və universitet–praktika əməkdaşlığının əhəmiyyətindən bəhs edib.

Proqram çərçivəsində məktəbəqədər təhsilin müasir çağırışları, erkən uşaqlıq dövründə öyrənmə xüsusiyyətləri, inklüziv və inkişafetdirici təhsil mühitinin qurulması, eləcə də fərqli inkişaf xüsusiyyətlərinə malik uşaqlarla iş metodları müzakirə olunub.

Sessiyada "Ağ Yelkən" brendinin təsisçisi, kurikulum mütəxəssisi Yuliya Kərimova post-innovativ dövrdə məktəbəqədər təhsil və erkən öyrənmə yanaşmalarından bəhs edib. MÜTDA-nın Uşaq inkişafı və rifahı şöbəsinin aparıcı mütəxəssisi Aygün Bayraməliyeva erkən uşaqlıq dövrünün inkişaf xüsusiyyətləri ilə bağlı təqdimatla çıxış edib.

Xəzər Universitetinin Psixologiya departamentinin müəllimi, Uğur İnkişaf Mərkəzinin direktoru Kəmalə Əliyeva "Fərqli uşaqlar" anlayışı, onların inkişafında bağçanın rolu, inkişafetdirici mühitin təşkili, ToM və SCAMPER metodlarının tətbiqi barədə nəzəri və praktik biliklərini iştirakçılarla bölüşüb.

Emalatxananın növbəti hissəsində Ağ Yelkən Gənclik uşaq bağçasının tərbiyəçi-müəllimləri Yazgül Abbasova və Zərifə Amanova inklüziv və təhlükəsiz təhsil mühitinin təşkili, oyun əsaslı öyrənmə və interaktiv fəaliyyətlərin planlaşdırılması üzrə praktik nümunələr təqdim ediblər.

Tədbirin sonunda isə Ağ Yelkən Gənclik uşaq bağçasının valideyni Nigar İsmayılzadə övladının təhsil prosesində müşahidə etdiyi inkişaf və əldə olunan nəticələr barədə iştirakçılarla öz təcrübəsini bölüşüb.

Müzakirələr, praktik tapşırıqlar və refleksiya sessiyaları ilə zəngin olan emalatxana iştirakçıların peşəkar bilik və bacarıqlarının inkişafına, təcrübə mübadiləsinin genişlənməsinə və universitet ilə praktik təhsil müəssisələri arasında əməkdaşlığın möhkəmlənməsinə çox faydalıdır.

Xəzər Universitetinin tərəfdaş qurumlarla birgə həyata keçirdiyi bu layihə təhsil, elm və cəmiyyət arasında əlaqələrin gücləndirilməsi, elmi biliklərin praktikaya inteqrasiyası və məktəbəqədər təhsil sahəsində peşəkar inkişafın dəstəklənməsi istiqamətində həyata keçirdiyi fəaliyyətlərin növbəti uğurlu nümunələrindən biridir.