Türkiyənin Akdeniz Universitetinin Təhsil fakültəsinin  müəllimləri Derya Alkan və Melikegül Bedir Erasmus proqramı çərçivəsində 2026 – cı il iyulun 2-3- də Xəzər Universitetinin qonağı oldular. Psixologiya departamentinin təşkilatçılığı ilə keçirilən səfər çərçivəsində professor-müəllim heyəti və tələbələr üçün müxtəlif mövzularda elmi-praktik seminarlar təşkil edildi.

Derya Alkanın seminarında “Kariyer Danışmanlığında Süni İntellekt ve Qara Qutu Problemi” mövzusu müzakirə olundu. Tədbirdə Psixologiya departamentinin əməkdaşları, fakültə müəllimləri və tələbələr iştirak etdilər. Seminarda süni intellekt texnologiyalarının karyera məsləhətçiliyində tətbiqi, qərarvermə prosesində şəffaflıq məsələləri, "Qara qutu" probleminin mahiyyəti və onun etik aspektləri barədə geniş məlumat verildi. Mövzu ətrafında aparılan müzakirələr iştirakçılar üçün həm nəzəri biliklərin, həm də müasir yanaşmaların öyrənilməsi baxımından faydalı oldu.

 “İş həyatının keyfiyyəti və özünəşəfqət” mövzusunda seminarda Melikegül Bedir məruzə etdi.  İştirakçılar iş həyatında psixoloji rifahın qorunması, özünəşəfqətin fərdi və peşəkar inkişafdakı rolu, stressin idarə olunması və emosional dayanıqlılığın gücləndirilməsi mövzularında ətraflı məlumat əldə etdilər. Seminar interaktiv müzakirələr şəraitində keçərək, böyük marağa səbəb oldu.

Erasmus proqramı çərçivəsində keçirilən seminarlar Psixologiya departamentinin beynəlxalq əməkdaşlıq sahəsində fəaliyyətinin inkişafına töhfə verməklə yanaşı, tələbə və müəllimlər üçün aktual elmi biliklərin və müasir praktik yanaşmaların paylaşılması baxımından mühüm əhəmiyyət kəsb edir.