Xəzər Universiteti Təbiət elmləri, sənət və texnologiya yüksək təhsil fakültəsi və Riyaziyyat departamentinin təşkilatçılığı ilə doktorant Zibaxanım Əlibalayevanın 2026-cı il iyunun 25-də “Süni intellektin riyaziyyatın öyrənilməsində və öyrədilməsində effektivliyi” mövzusunda seminarı keçirilib.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Kanadanın University of Victoria universitetində riyaziyyat təhsili ixtisası üzrə doktorantura təhsili alır.

Bu seminar çərçivəsində süni intellektin riyaziyyat təhsilində istifadəsi ilə bağlı mövcud elmi ədəbiyyat ümumiləşdirilib, AI alətlərinin şagirdlər və müəllimlər üçün yaratdığı imkanlar, eləcə də onların üstünlükləri və məhdudiyyətləri təqdim edilib. Təqdimatda həmçinin, ali təhsil müəssisələrində AI istifadəsinə dair etik yanaşmalar nəzərdən keçirilib. Bundan əlavə, məruzəçinin həmmüəllifi olduğu, ChatGPT-4o, ThetaWise və Mathos AI çatbotlarının riyazi tapşırıqların həllindəki performansını müqayisə edən tədqiqatın nəticələri iştirakçıların diqqətinə çatdırılıb. Tədqiqat nəticələri göstərib ki, araşdırılan çatbotların heç biri, xüsusilə şəkil əsaslı riyaziyyat suallarında, tam etibarlı performans nümayiş etdirməyib. Ən çox rast gəlinən problemlər isə sualların və şəkillərin düzgün oxunmaması ilə bağlı olub. Təqdimatın yekununda qeyd edilib ki, AI alətləri riyaziyyat təhsilində faydalı dəstək vasitəsi kimi çıxış etsə də, onların təqdim etdiyi cavabların müəllimlər və şagirdlər tərəfindən tənqidi şəkildə qiymətləndirilməsi zəruridir.