Bakıda 2026-cı il iyunun 29- da Birinci Türkoloji Qurultayın 100 illiyinə həsr olunmuş “Türk Dünyası Həftəsi”nin rəsmi açılış mərasimi keçirilib. İyulun 3-dək davam edəcək tədbirlər  Azərbaycan Respublikasının Prezidenti İlham Əliyevin müvafiq Sərəncamına əsasən təşkil olunur.

Türk dünyasının ortaq tarixi, dili, mədəniyyəti və elmi irsinin təbliği, türkologiya sahəsində beynəlxalq əməkdaşlığın genişləndirilməsi məqsədini daşıyan tədbirin açılış mərasimində dövlət və hökumət rəsmiləri, beynəlxalq təşkilatların nümayəndələri, müxtəlif ölkələrdən tanınmış alimlər, türkologiya üzrə tədqiqatçılar, ali təhsil müəssisələrinin rəhbərləri və ictimai xadimlər iştirak ediblər.

Xəzər Universitetini tədbirdə Dillər və ədəbiyyatlar departamentinin müdiri dos. Dilbər Zeynalova, Tarix və arxeologiya departamentinin müdiri dos. Telman Nüsrətoğlu və Siyasi elmlər və fəlsəfə departamentinin müdiri dos. Orxan Vəliyev təmsil ediblər. "Türk Dünyası Həftəsi" çərçivəsində keçiriləcək beynəlxalq konqreslər, elmi konfranslar, panel müzakirələri, sərgilər, mədəni proqramlar türk xalqlarının ortaq elmi, mədəni irsinin öyrənilməsi, türkologiya sahəsində yeni elmi əməkdaşlıqların qurulması və gələcək inkişaf istiqamətlərinin müəyyənləşdirilməsi baxımından mühüm əhəmiyyət daşıyır. Xəzər Universitetinin nümayəndələrinin bu nüfuzlu beynəlxalq tədbirdə iştirakı universitetin türkologiya, tarix, dilçilik və ictimai elmlər sahələrində beynəlxalq akademik əməkdaşlığın inkişafına verdiyi töhfənin və türk dünyasının elmi inteqrasiyasına göstərdiyi marağın növbəti ifadəsidir.