Xəzər Universitetinin “Vortex Team” komandası 2026-cı il mayın 27- 28- də  keçirilən “World Caspian Cup 2026” beynəlxalq robot müsabiqəsində universiteti uğurla təmsil edərək, mühüm nailiyyət qazanmışdır.

Komandanın tərkibinə universitetin Fizika və elektronika departamentinin Elektrik-elektronika mühəndisliyi ixtisasının III kurs tələbələri Tural Şaban, Vasif Əhmədov, Elşən Cabbarov, Turan Məmmədli, eləcə də Mexanika departamentinin III kurs tələbəsi Humeyra Əskərova daxil olmuşdur.

Müsabiqə çərçivəsində komandanın hazırladığı innovativ robot layihəsi münsiflər heyəti tərəfindən yüksək qiymətləndirilmiş, komanda uğurla final mərhələsinə vəsiqə qazanmışdır. Final mərhələsində nümayiş etdirdiyi yaradıcı mühəndislik həlləri və robotun yüksək texniki dizaynına görə, komanda “World Caspian Cup 2026 Special Award for Best Robot Design” xüsusi mükafatına layiq görülmüşdür.

Bu uğur Xəzər Universitetində mühəndislik təhsilinin, innovasiya və robototexnika sahəsində aparılan fəaliyyətin yüksək səviyyəsini bir daha nümayiş etdirir. Universitet rəhbərliyi komanda üzvlərini bu əlamətdar nailiyyət münasibətilə təbrik edir, onlara gələcək elmi və peşəkar fəaliyyətlərində yeni uğurlar arzulayır.