Xəzər Universiteti QS Quacquarelli Symonds reytinq agentliyi tərəfindən aparılan QS Stars auditində 5 ulduza layiq görülmüşdür.

QS Stars auditi çərçivəsində 9 əsas fəaliyyət istiqaməti - tədris, tədqiqat, infrastruktur, qlobal əlaqələr, məşğulluq, səmərəli idarəetmə, ətraf mühitə təsir, təhsil proqramının mükəmməlliyi, eləcə də müxtəliflik, bərabərlik və inklüzivlik kateqoriyaları üzrə qiymətləndirmə olmuşdur.  Xəzər Universiteti bu kateqoriyalardan 8-də mümkün olan ən yüksək nəticəni əldə etmişdir.

Bu nailiyyət universitetin təhsilin keyfiyyətinin yüksəldilməsi, tədqiqat potensialının gücləndirilməsi, beynəlmiləlləşmə imkanlarının genişləndirilməsi, məzunların məşğulluğunun artırılması, dayanıqlılıq prinsiplərinin təşviqi, infrastrukturun inkişafı və tələbələrə dəstək xidmətlərinin təkmilləşdirilməsi istiqamətində həyata keçirdiyi məqsədyönlü fəaliyyətin nəticəsidir. Eyni zamanda, bu nəticə universitetin beynəlxalq standartlara cavab vermək və müasir ali təhsil prioritetlərinə uyğun inkişaf etmək istiqamətində qazandığı uğuru nümayiş etdirir. Xəzər Universitetinin bu nailiyyəti davamlı inkişaf istiqamətində əhəmiyyətli irəliləyiş olmaqla yanaşı, onun Azərbaycanın aparıcı ali təhsil müəssisələrindən biri kimi mövqeyini daha da möhkəmləndirir. 

QS Stars ali təhsil müəssisələrinin fəaliyyətini müxtəlif kateqoriyalar üzrə ölçülə bilən göstəricilər əsasında qiymətləndirən beynəlxalq audit və reytinq sistemidir. Digər reytinq sistemlərindən fərqli olaraq, QS Stars ali təhsil müəssisələrini bir-biri ilə müqayisə etmədən, onların fəaliyyət göstəricilərini və müəyyən edilmiş meyarlara uyğunluğunu qiymətləndirir. Bu yanaşma universitetlərə reytinq cədvəllərindəki mövqeyindən asılı olmayaraq, öz güclü tərəflərini və institusional üstünlüklərini nümayiş etdirmək imkanı verir. QS Stars universitetlərin güclü tərəfləri barədə daha geniş və ətraflı təsəvvür formalaşdıraraq, tələbələrə, tərəfdaşlara və digər maraqlı tərəflərə öz məqsəd və gözləntilərinə uyğun istiqamətlərdə yüksək nəticələr göstərən ali təhsil müəssisələrini müəyyənləşdirməyə şərait yaradır.