Xəzər Universitetinin rektoru Dr. Raziyə  İsayeva 2026-cı il iyunun 22-də Bakıda İslam Dünyası Təhsil, Elm və Mədəniyyət Təşkilatının (ICESCO) Bakı Regional Ofisi və Sultan bin Abdulaziz Al Saud Fondunun birgə təşkilatçılığı ilə həyata keçirilən “Sultan bin Abdulaziz Al Saud Beynəlxalq Dil Təlimi Proqramı: Mərkəzi Asiya və Qafqazda ərəb dili” layihəsinin bağlanış mərasimində iştirak edib.

Mərasimdə ICESCO-nun Bakı Regional Ofisinin direktoru Dr. Abdulhakeem Fahad AlSenan, Sultan bin Abdulaziz Al Saud Fondunun baş direktoru Saleh İbrahim Al-Khulaifi, ICESCO-nun Ərəb Dilini Qeyri-Ana Dili Kimi Öyrənənlər Mərkəzinin rəhbəri Majdi Haji İbrahim,  Azərbaycan Respublikası Mədəniyyət Nazirliyinin Beynəlxalq əlaqələr şöbəsinin müdiri və Azərbaycan Respublikasının ICESCO üzrə Milli Komissiyasının baş katibi Fərrux Cumayev çıxış edərək,  proqramın nəticələri və regionda təhsil sahəsində əməkdaşlığın inkişafına verdiyi töhfələr barədə məlumat veriblər.

Tədbir çərçivəsində layihənin həyata keçirilməsinə həsr edilmiş videoçarx nümayiş olunub və proqramın uğurla başa çatmasını əks etdirən ümumi foto çəkdirilib.

Layihə region ölkələri arasında təhsil sahəsində əməkdaşlığın gücləndirilməsinə, mədəniyyətlərarası dialoqun təşviqinə və ərəb dilinin tədrisinin inkişafına mühüm töhfədir.