Xəzər Universitetinin İqtisadiyyat və menecment departamentinin assistenti Lamiyə Haşımlının təşkilatçılığı ilə tələbələr 2026-cı il iyunun 16-da NORM Sement zavodunda ekskursiyada olublar.

Ekskursiya  tələbələrin istehsal müəssisələrinin idarəetmə, əməliyyat və maliyyə fəaliyyətləri ilə yaxından tanış olmaları, universitetdə əldə etdikləri nəzəri bilikləri real iş mühiti ilə əlaqələndirmələri məqsədi daşıyıb.

Tələbələr əvvəlcə zavodun seminar zalında keçirilən təqdimatda iştirak ediblər. Təqdimat çərçivəsində müəssisənin fəaliyyəti, sement istehsalının mərhələləri, xammalın əldə olunması və emalı, istehsal prosesində tətbiq olunan müasir texnologiyalar, eləcə də məhsulun keyfiyyətinə təsir edən amillər haqqında ətraflı məlumat verilib.

İştirakçılar istehsal planlaşdırılması, resursların idarə olunması, keyfiyyətə nəzarət sistemləri və əməliyyat səmərəliliyinin artırılması istiqamətində həyata keçirilən fəaliyyətlərlə də tanış olublar. Xüsusilə, istehsal xərclərinin idarə olunması, məhsulun maya dəyərinin formalaşması, investisiyaların istehsal prosesində rolu və resurslardan səmərəli istifadənin müəssisənin maliyyə nəticələrinə təsiri barədə verilən məlumatlar tələbələrin böyük marağına səbəb olub.

Təhlükəsizlik qaydaları ilə tanış olduqdan sonra tələbələr istehsalat sahəsinə keçərək, sement istehsalının müxtəlif mərhələlərini yerində müşahidə ediblər. Onlar seminar zamanı əldə etdikləri nəzəri bilikləri praktik proseslər üzərində izləmək, istehsalın təşkili və idarə olunması ilə bağlı məlumatlarını daha da zənginləşdirmək imkanı qazanıblar.

Ekskursiyanın sonunda tələbələr belə səfərlərin akademik biliklərin praktik tətbiqini anlamaq, biznes proseslərini real iş mühitində müşahidə etmək və gələcək peşə fəaliyyətləri üçün zəruri təcrübə qazanmaq baxımından mühüm əhəmiyyət daşıdığını qeyd ediblər.

Bu cür ekskursiyalar tələbələrin peşəkar inkişafına dəstək olmaqla yanaşı, onların sənaye müəssisələrinin fəaliyyət prinsipləri, idarəetmə mexanizmləri və maliyyə prosesləri haqqında daha geniş təsəvvür formalaşdırmasına imkan yaradır.