Dünyanın ən nüfuzlu reytinq agentliklərindən olan “Quacquarelli Symonds” (QS) tərəfindən tərtib edilən “QS World University Rankings 2027” reytinqinin 23-cü buraxılışına əsasən, Xəzər Universiteti dünyanın ən yaxşı universitetləri sırasında yer alıb.

2026-cı il iyunun 18- də QS qlobal ali təhsil qiymətləndirmə agentliyi tərəfindən açıqlanan nəticələrə əsasən, Xəzər Universiteti qlobal reytinqdə 801–850-ci sıralarda qərarlaşıb və Azərbaycan üzrə 4-cü yeri tutub.

Ümumilikdə, reytinq çərçivəsində 106 ölkədən 8808 ali təhsil müəssisəsi qiymətləndirilib. Onlardan 1504 universitet dərc edilmiş reytinq siyahısına daxil edilib. Azərbaycan bu qlobal reytinqdə 10 ali təhsil müəssisəsi ilə təmsil olunub.

Bu ilin nəticələri Xəzər Universitetinin “Akademik nüfuz”, “İşəgötürənlər arasında nüfuz”, “Müəllim-tələbə nisbəti”, “Əcnəbi müəllim payı”, “Əcnəbi tələbə payı” və “Məşğulluq göstəriciləri” üzrə mövqeyini gücləndirmək istiqamətində həyata keçirdiyi ardıcıl fəaliyyətin göstəricisidir. Nəticələrin təhlili göstərir ki, Xəzər Universiteti bu il “Əcnəbi müəllim payı”, “Əcnəbi tələbə payı”, “Müəllim-tələbə nisbəti”, “İşəgötürənlər arasında nüfuz” və digər əsas göstəricilər üzrə nəzərəçarpan mövqelər əldə edib.

Xəzər Universitetinin “QS World University Rankings 2027” reytinqində mövqeyini əhəmiyyətli dərəcədə yaxşılaşdırması təkcə universitet üçün deyil, ümumilikdə, Azərbaycanın ali təhsil sisteminin beynəlxalq nüfuzunun artması baxımından da mühüm nailiyyətdir.