Türkiyənin  Konya şəhərində  Türk Psixoloji Danışma Dərnəyinin təşkilatçılığı ilə 2026-cı il 10- 12 iyun aralığında  “Diqqət-Asılılıq-Ailə: fokuslan- əlaqə yarat və güclən”  adlı  27-ci Beynəlxalq Psixologiya Konfransı təşkil edilib. Konfransda Xəzər Universitetinin Psixologiya departamentinin koordinatoru, Xəzər Psixoloji Xidmət Mərkəzinin rəhbəri, psixoloq Mələk Kərimova  “Qaranlıq üçlü (Makyavelizm, Narsisizm və Psixopatiya) və psixoloji rifah göstəriciləri: sistematik təhlil” adlı məruzə ilə çıxış edib.

PRISMA protokolu əsasında aparılan tədqiqatda “qaranlıq üçlü” şəxsiyyət xüsusiyyətlərinin psixoloji rifah, həyat məmnunluğu, depressiya, narahatlıq və stress göstəriciləri ilə əlaqəsi 2014-2026 illəri əhatə edəcək şəkildə  sistematik araşdırılıb. Tədqiqat çərçivəsində yeniyetmələr, universitet tələbələri və böyüklər üzərində aparılmış empirik araşdırmalar təhlil olunaraq, həyat məmnunluğu, subyektiv rifah, depressiya, narahatlıq və stress kimi dəyişənlərlə əlaqələr qiymətləndirilib. Araşdırmanın nəticələrinə görə, psixopatiya psixoloji çətinliklərlə ən güclü əlaqəyə malik xüsusiyyət kimi müəyyən edilib. Makyavelizmin sosial dəstəyin zəifliyi və qeyri-funksional mübarizə üsulları vasitəsilə rifaha mənfi təsir göstərdiyi, narsisizmin isə formasından asılı olaraq həm müsbət, həm də mənfi nəticələrlə əlaqəli olduğu müəyyənləşdirilib. Həmçinin,  emosiyaların tənzimlənməsi proseslərinin bu əlaqələrdə mühüm rol oynadığı vurğulanıb.

Məruzədə gələcək tədqiqatlar üçün uzunmüddətli və mədəniyyətlərarası araşdırmaların aparılmasının vacibliyi qeyd olunub.

Xəzər Universitetinin beynəlxalq elmi tədbirlərdə fəal iştirakı universitetin elmi-tədqiqat fəaliyyətinin inkişafına və beynəlxalq akademik əməkdaşlığın gücləndirilməsinə mühüm töhfə verir.