Xəzər Universitetinin Memarlıq və dizayn departamentinin müəllim və tələbələri 2026-cı il iyunun 6- da  Corian Baku şirkətinə tanışlıq səfəri ediblər.

Səfərin məqsədi tələbələri müasir memarlıq və interyer dizaynında geniş istifadə olunan Corian materialı, onun istehsal texnologiyası, texniki xüsusiyyətləri və tətbiq imkanları ilə yaxından tanış etmək olub.

Tədbirdə Dizayn və Memarlıq ixtisaslarının I və II kurs tələbələri iştirak ediblər. Səfərə Memarlıq və dizayn departamentinin rəhbəri Nigar Əliyeva, müəllim Fatma Ataşkaya rəhbərlik ediblər.

Corian Baku şirkətinin nümayəndələri tələbələrə Corian materialının estetik və funksional xüsusiyyətləri, emal üsulları və müxtəlif memarlıq və dizayn layihələrində tətbiqi barədə ətraflı məlumat veriblər. Tələbələr istehsal prosesini yaxından izləyib, material nümunələri ilə tanış olaraq, onun imkanları haqqında praktiki biliklər əldə ediblər.

Səfər çərçivəsində tələbələr Corian materialından hazırlanmış müasir mətbəx məhsulları  ilə də tanış olublar. Onlara şirkətin təqdim etdiyi induksiya səthində yemək hazırlanması nümayiş etdirilib və bu texnologiyanın gündəlik istifadə üçün yaratdığı üstünlüklər barədə məlumat verilib.

Görüş zamanı Corian Baku şirkətindən  tələbələrə maraqlı təklif olub. Bildirilib ki, tələbələrin Corian materialından istifadə etməklə, öz kreativ dizayn layihələrini hazırlamaları  mümkündür və uğurlu işlərin şirkət tərəfindən dəyərləndirilərək, istifadə  oluna biləcəyi qeyd edilib . Bu təşəbbüs tələbələrin yaradıcılıq potensialının inkişafına və sənaye ilə universitet əməkdaşlığının gücləndirilməsinə xidmət edir.

Belə tanışlıq səfərləri tələbələrin nəzəri biliklərini praktik təcrübə ilə zənginləşdirməklə yanaşı, onların peşəkar fəaliyyət sahələri ilə yaxından tanış olmalarına və gələcək karyera inkişaflarına mühüm töhfə verir.