Xəzər Universitetinin Siyasi elmlər və fəlsəfə departamentinin müəllimi Dr. Firuz Süleymanovun “Qarabağ uğrunda keçmiş Ermənistan–Azərbaycan münaqişəsində su ehtiyatlarının geosiyasi rolu” (The Geopolitical Role of Water in the Former Armenia–Azerbaijan Conflict over Karabakh) adlı məqaləsi “Geopolítica(s)” jurnalında nəşr edilmişdir (Cild 17, № 1, 2026).

Məqalədə Cənubi Qafqazda su ehtiyatlarının qeyri-bərabər paylanması, iqlim dəyişikliyi və silahlı münaqişələrin regionda su ilə bağlı problemləri daha da dərinləşdirməsi təhlil edilir. Müəllif göstərir ki, su ehtiyatları və xüsusilə Sərsəng su anbarı kimi strateji infrastruktur obyektləri keçmiş Ermənistan–Azərbaycan münaqişəsi dövründə əraziyə nəzarət, təhlükəsizlik və siyasi təsir baxımından mühüm rol oynamışdır. Tədqiqatın nəticələrinə görə, su amili münaqişədə ikinci dərəcəli faktor deyil, ərazi rəqabəti və geosiyasi qarşıdurmanın əsas elementlərindən biri olmuşdur.

Qeyd edək ki, “Geopolítica(s)” İspaniyanın Madrid Komplutense Universiteti tərəfindən nəşr olunan və Scopus elmmetrik bazasında indekslənən beynəlxalq elmi jurnaldır.

Məqaləyə keçid: https://doi.org/10.5209/geop.94926