Xəzər Universitetinin Təbiət elmləri, sənət və texnologiya yüksək təhsil fakültəsinin elmi işlər üzrə dekan müavini, astronomiya üzrə fəlsəfə doktoru Günay Hacıyeva Erasmus+ proqramı çərçivəsində 2026-cı il 1-5 iyun aralığında Türkiyənin Manisa Celal Bayar Universitetində ezamiyyətdə olub.

Ezamiyyət müddətində Günay Hacıyeva Manisa Celal Bayar Universitetinin rektoru professor Dr. Rana Kibar ilə görüşüb. Görüş zamanı hər iki universitet arasında akademik əməkdaşlığın genişləndirilməsi, müəllim və tələbə mübadiləsinin inkişaf etdirilməsi, birgə elmi layihələrin həyata keçirilməsi və gələcək əməkdaşlıq perspektivləri ətrafında geniş fikir mübadiləsi aparılıb.

Dekan müavini G. Hacıyeva müəllim və tələbələr qarşısında təqdimatla çıxış edərək, Xəzər Universitetinin tarixi, təhsil və tədqiqat imkanları, beynəlxalq əməkdaşlıq fəaliyyəti və həyata keçirilən layihələr haqqında məlumat verib. O, həmçinin, A və F spektral sinifli ulduzların fundamental parametrləri və kimyəvi tərkibi mövzusunda apardığı elmi-tədqiqat işinin nəticələrini iştirakçılarla bölüşüb.

Səfər çərçivəsində Fizika departamentinin müəllimləri dosent Dr. Fehmi Bardak və Dr. Funda Aksoy ilə də görüş keçirilib. Görüş zamanı astronomiya və astrofizika elmi istiqamətində gələcək birgə tədqiqat imkanları, beynəlxalq layihələrdə iştirak və elmi əməkdaşlıq perspektivləri müzakirə olunub.

Elektrik-elektronika mühəndisliyi departamentinin professoru Dr. Cemile Bardakın müşayiəti ilə fakültənin müasir elmi-tədqiqat və tədris laboratoriyalarına da  baş çəkilib. Günay Hacıyeva laboratoriyalarda həyata keçirilən elmi-tədqiqat fəaliyyətləri, tədris prosesində istifadə olunan müasir avadanlıqlar və tələbələrin praktiki hazırlıq imkanları ilə yaxından tanış olub.

Keçirilən görüşlər və akademik müzakirələr hər iki universitet arasında əlaqələrin daha da inkişaf etdirilməsi, birgə elmi-tədqiqat layihələrinin hazırlanması və beynəlxalq əməkdaşlığın genişləndirilməsi baxımından çox  faydalı olub.