Xəzər Universiteti Təbiət elmləri, sənət və texnologiya yüksək təhsil fakültəsi və İqtisadiyyat və menecment departamentinin təşkilatçılığı ilə 2026-cı il mayın 22-də doktorant Əli Rzayevin “Elmi araşdırmanın mahiyyəti, mərhələləri və etik prinsipləri” mövzusunda seminarı keçirildi.

Məruzəçi “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Türkiyənin İstanbul Universitetində “Əmək iqtisadiyyatı və sənaye münasibətləri” ixtisası üzrə doktorantura təhsili alır.

Seminarda məruzəçi elmi araşdırmanın sadəcə məlumat toplamaqdan ibarət olmadığını, onun müəyyən mərhələləri (problemin müəyyənləşdirilməsi, hipotezin qurulması, məlumatların toplanması və təhlili, nəticələrin ümumiləşdirilməsi) ardıcıl şəkildə izləyən sistemli bir proses olduğunu izah etdi və həmçinin,  araşdırmaçının işinin texniki cəhətdən düzgün olmaqla yanaşı, dürüstlük, şəffaflıq və başqalarının əməyinə hörmət kimi etik prinsiplərə də söykənməli olduğunu vurğuladı.