Türkiyənin Atılım Universiteti Təchizat şöbəsinin müdir köməkçisi Hakan Tetik Erasmus+ əməkdaş heyətinin mobilliyi proqramı çərçivəsində 2026-cı il 1-5 iyun aralığında  Xəzər Universitetində olub.

Beynəlxalq əlaqələr şöbəsinin təşkilatçılığı ilə keçirilən görüşdə Təmir-tikinti işləri şöbəsi, Təşkilati sənədləşmə şöbəsi, İnsan resursları şöbəsi və Beynəlxalq əlaqələr şöbəsinin əməkdaşları iştirak ediblər.

Qonağa Xəzər Universiteti haqqında ətraflı məlumat verilib və universitetin fəaliyyəti, idarəetmə sistemi, beynəlxalq əməkdaşlıq imkanları barədə təqdimat nümayiş etdirilib. Görüş zamanı hər iki universitetin struktur bölmələrinin fəaliyyəti, inzibati və texniki proseslərin təşkili, iş prinsipləri, eləcə də tətbiq olunan təcrübələr barədə danışılıb. Tərəflər arasında oxşar və fərqli yanaşmalar müzakirə edilib, qarşılıqlı təcrübə bölüşülüb.

Səfər çərçivəsində Hakan Tetik universitetin müvafiq şöbələrinin fəaliyyəti ilə yaxından tanış olub, əməkdaşlarla görüşərək, onların iş prosesi haqqında məlumatlanıb.

 Erasmus+ proqramı çərçivəsində reallaşan bu cür əməkdaşlıqlar tərəfdaş universitetlər arasında təcrübə mübadiləsinin gücləndirilməsinə və institusional əlaqələrin inkişafına töhfə verir.