Çexiyanın Palacky Olomouc Universitetinin Bədən Tərbiyəsi fakültəsinin əməkdaşı Miroslav Roncak Erasmus+ proqramı çərçivəsində 2026-cı il iyunun 8-də  Xəzər Universitetində olub. Səfər iyunun 19- dək davam edəcək.

Səfər çərçivəsində Beynəlxalq əlaqələr şöbəsinin təşkilatçılığı ilə görüş keçirilib. Görüşdə şöbənin əməkdaşları ilə yanaşı, Coğrafiya və ətraf mühit departamentinin müəllimləri Dr. Rövşən Abbasov və Dr. Rövşən Kərimov da  iştirak ediblər.

Görüş zamanı qonağa Xəzər Universitetinin fəaliyyəti, akademik proqramları və beynəlxalq əməkdaşlıq imkanları haqqında ətraflı məlumat verilib. Tərəflər arasında coğrafiya, ətraf mühit və turizm sahələrində mövcud əməkdaşlıq imkanları müzakirə olunub.

Müzakirə  zamanı Azərbaycanın zəngin turizm potensialı, ölkənin müxtəlif coğrafi bölgələrinin özünəməxsus xüsusiyyətləri, təbii landşaft müxtəlifliyi və ekoturizm imkanlarından söz açılıb.  Həmçinin, təhsil və tədqiqat sahələrində gələcək əməkdaşlıq perspektivləri, tələbə və əməkdaş mübadiləsi imkanlarından danışılıb.

Səfər çərçivəsində Miroslav Roncak universitetin kampusu və müvafiq akademik bölmələri ilə tanış olub, əməkdaşlarla görüşərək, qarşılıqlı maraq doğuran mövzular üzrə fikir mübadiləsi aparıb.