Xəzər Universitetində mübadilə proqramı çərçivəsində təhsil alan Pekin Xarici Dillər Universitetinin Azərbaycan dili ixtisası üzrə 3-cü kurs tələbələri Kou Sinyən və Tu Kayyanq Çində keçirilən “Asiyanın səsi” müsabiqəsində uğur qazanıblar.

 PXDU-nun Azərbaycan dili kafedrasının müdiri, filologiya üzrə fəlsəfə doktoru Aqşin Əliyevin rəhbərliyi ilə müsabiqəyə hazırlaşan tələbələr “Xəzərin sədası” adlı komandanın tərkibində çıxış ediblər. Onlar Azərbaycan kinosunun klassik nümunələrindən olan “Bizim Cəbiş müəllim” filmindən seçilmiş fraqmentləri Azərbaycan dilində səsləndirərək,  müsabiqəyə təqdim ediblər. Münsiflər heyətinin qərarına əsasən, “Xəzərin sədası” komandası müsabiqədə II yerə layiq görülüb.

Qeyd edək ki, Asiya dilləri üzrə təhsil alan tələbələr arasında təşkil olunan “Asiyanın səsi” müsabiqəsində Çinin 10-dan çox ali təhsil müəssisəsinin nümayəndələri iştirak ediblər.