Xəzər Universitetinin rektoru Dr. Raziyə  İsayeva  2026 – cı il iyunun 3- də  Brüssel şəhərində keçirilən Belçika-Azərbaycan Forumu (Weaving Nations) təşəbbüsünün ilk iclasında iştirak edib.

Tədbirdə Belçika və Azərbaycanın ali təhsil, tədqiqat, mədəniyyət, media, idman, vətəndaş cəmiyyəti və digər sahələrini təmsil edən yüksək səviyyəli nümayəndələr iştirak ediblər. Forum çərçivəsində “İnnovasiya dövründə təhsil”, “İncəsənət və mədəni irs vasitəsilə mədəniyyətlərarası körpülərin qurulması” və “Rəqəmsal dövrdə informasiya məkanında istiqamətlər” mövzularında panellər təşkil olunub.

Xəzər Universitetinin rektoru Dr. Raziyə  İsayeva “İnnovasiya dövründə təhsil” panelində universitetin beynəlxalq əməkdaşlıq istiqamətləri, akademik inkişaf strategiyası və Azərbaycan ali təhsilinin beynəlmiləlləşməsi sahəsində həyata keçirilən təşəbbüslər barədə məlumat verib.

Tədbir çərçivəsində Dr. Raziyə İsayeva AnewZ telekanalına müsahibə verərək, forumun əhəmiyyətini vurğulayıb. O, bu platformanın Azərbaycan və Belçika arasında əlaqələrin genişləndirilməsi, yeni tərəfdaşlıqların qurulması baxımından mühüm rol oynadığını qeyd edib.

Forumun əsas məqsədi Belçika və Azərbaycan arasında sistemli və uzunmüddətli tərəfdaşlıq əlaqələrinin qurulmasına dəstək verməkdir.

Qeyd edək ki, forumun ikinci iclası  2026-cı ilin noyabr ayında Bakıda keçiriləcək.

https://share.google/hj6ZJKoYSgMu59KOD