Xəzər Universitetinin Memarlıq ixtisası üzrə 2-ci kurs tələbəsi Elmira Novruzova Kent Orman Yaşam Atölyesi  (KOYA) layihəsi çərçivəsində mühüm təcrübə qazanıb.

Kent Orman Yaşam Atölyesi Türkiyədə Dr. Nejla Kılınçın postdoktoral tədqiqatı çərçivəsində inkişaf etdirdiyi “Ufuk Planlama” platforması əsasında yaradılmış beynəlxalq və multidissiplinar şəhərçilik atelyesidir. Layihə Bakıda Xəzər Universiteti ilə əməkdaşlıq çərçivəsində üç dəfə reallaşdırılıb.

Elmira Novruzova ilk dəfə  Xəzər Universitetində keçirilən KOYA 5 tədbirində iştirak edib. Sonra Berlində təşkil olunan KOYA 8 tədbirinə  qatılıb. Son olaraq isə KOYA 9-da yenidən bu prosesin iştirakçısı  olub. Elmira Novruzova əvvəlki tədbirlərdə  göstərdiyi uğurlu performansdan sonra atelyenin qurucusu və rəhbəri Dr. Nejla Kılınç tərəfindən gənc təlimçi namizədi kimi dəvət olunub. KOYA-nın əsas məqsədlərindən biri də öz iştirakçıları arasından gələcəyin təlimçilərini yetişdirməkdir.

Bu çərçivədə Elmira Novruzova Nyu-Yorka etdiyi səfər zamanı şəhəri gənclərin yaşayış və kirayə problemləri, həmçinin, dünyadakı mənzil məsələsi baxımından araşdırıb. O, Nyu-Yorkdakı yaşayış şəraitini, kirayə qiymətlərini və barınma problemini öz müşahidələri əsasında analiz edib. Sonra bu araşdırmanı dərs formatına çevirərək,  KOYA 9 iştirakçılarına təqdim edib.

Bu təqdimat Elmira Novruzovanın ilk təlimçilik təcrübəsi olub və həm atelyenin qurucusu Dr. Nejla Kılınç, həm də iştirakçılar tərəfindən müsbət rəylərlə qarşılanıb.

Elmira Novruzova  Təhlükəsiz və dayanıqlı şəhərlər və yaşayış məskənləri - WUF 13 tədbirində media nümayəndəsi kimi iştirak edib.

“Xəzər”in beynəlxalq əməkdaşlığı nəticəsində Elmira Novruzova  Malayziyadan dəvət alıb və 2026- cı il mayın 17 – 22- i aralığında  keçirilən WUF 13 tədbirində media işçisi olaraq təşkilatçı tərəfi təmsil edib.

Tədbir çərçivəsində gün ərzində keçirilən görüşlərin, müzakirələrin, çıxışların və müxtəlif proqramların foto və video çəkilişləri həyata keçirilib. Elmira Novruzova komanda ilə birlikdə tədbirin əsas anlarını lentə alıb, iştirakçıların çıxışlarını və tədbirin ümumi atmosferini vizual materiallar vasitəsilə sənədləşdirib.

Çəkilən foto və videolar daha sonra xüsusi proqramlar vasitəsilə hazırlanıb və təşkilatçılara təqdim edilib. Həmin vizual materiallar təşkilatçıların rəsmi sosial media səhifələrində və kommunikasiya platformalarında paylaşılaraq,  geniş auditoriyaya çatdırılıb.

Bu tədbir Elmira Novruzova üçün həm beynəlxalq təcrübə, həm də media və vizual kommunikasiya sahəsində peşəkar bacarıqlarını inkişaf etdirmək baxımından mühüm addım olub.