Xəzər Universitetinin Nərimanov Kampusunun kitabxanasında Dillər və ədəbiyyatlar departamentinin “İnteqrativ dərs” layihəsi çərçivəsində 2026 – cı il mayın 26- da  Azərbaycan Milli Elmlər Akademiyasının Elm və təhsil şöbəsinin müdiri, filologiya elmləri doktoru Sərxan Xavəri “Məcnunluq: məlum məchulluqla naməlum məchulluq arasında” mövzusunda mühazirə demişdir. Dərsi giriş sözü ilə Dillər və ədəbiyyatlar departamentinin müdiri, dosent Dilbər Zeynalova açmış, qonağı təqdim etmiş, mövzunun aktullağından bəhs etmişdir. Dərsdə Məhəmməd Füzulinin eşq fəlsəfəsi, “Leyli və Məcnun” əsərində məcnunluq anlayışının fəlsəfi və irfani mahiyyəti, eşqin insanın mənəvi kamilləşməsindəki rolu haqqında geniş fikirlər səsləndirilmişdir.

Sərxan Xavəri Füzuli yaradıcılığında eşqin yalnız hiss deyil, həm də mənəvi idrak və kamilləşmə yolu kimi təqdim olunduğunu vurğulamış, “məcnunluq” anlayışının klassik Şərq düşüncəsindəki yeri və çağdaş interpretasiyası haqqında danışmışdır. Dərsin sonunda Azərbaycan dili və ədəbiyyatı ixtisasının tələbələri mövzu ilə bağlı suallar ünvanlamış və seminar interaktiv müzakirələrlə davam etmişdir. Sonda qonağa rəhbərlik adından təşəkkürnamə və hədiyyə təqdim edilmişdir.