2026-cı il mayın 26-da Balakən şəhəri Nizami adına 1 saylı tam orta məktəbdə Xəzər Universitetinin təqdimatı və “Biznes-Marketinq” mövzusunda yarışma təşkil olundu.

Tədbirdə Əməkdar müəllim, məktəbin direktoru Şəfiqə Tütünçüyeva çıxış edərək, məktəbdə belə maarifləndirici tədbirlərin keçirilməsinin şagirdlərin inkişafı üçün əhəmiyyətini vurğuladı. Sonra Xəzər Universiteti nümayəndələri — İqtisadiyyat və menecment fakültəsinin dekanı Dr. Dilarə Rəsulova, departament koordinatoru Polad Orucov və assistent Lamiyə Haşımlı şagirdləri universitet haqqında məlumatlandırdılar. Çıxışlar zamanı tələbələr üçün yaradılan imkanlar barədə məlumat verildi və şagirdlərin sualları cavablandırıldı.

Eyni zamanda, tədbirdə İqtisadiyyat və menecment fakültəsinin maliyyə ixtisası üzrə II il tələbəsi Şəfiqə Çiraqi çıxış edərək, öz təcrübəsini bölüşdü və universitet həyatı ilə bağlı fikirlərini iştirakçılarla paylaşdı.

Tədbirin ikinci hissəsi “Biznes-Marketinq” mövzusunda yarışma ilə davam etdi. Şagirdlər komanda şəklində tapşırıqları yerinə yetirərək 4 mərhələdə yekun təqdimatla çıxış etdilər. Daha sonra “Biz bu gün nə öyrəndik?” mövzusu ətrafında müzakirə apararaq, öz qiymətləndirmələrini bildirdilər.