Xəzər Universitetinin 35 illik yubileyi münasibətilə 2026-cı il mayın 25- də Neftçilər kampusunda Tələbə Məclisinin təşkilatçılığı ilə “KhazarFest 2026” tələbə festivalı keçirildi.

Festivalın əsas məqsədi tələbələri bir araya gətirmək, universitet daxilində birlik və tələbə ruhunu gücləndirmək, tələbə yaradıcılığını və innovativ təşəbbüsləri dəstəkləmək, eyni zamanda, universitetin beynəlxalq və multikultural mühitini nümayiş etdirmək olmuşdur.

Tədbirin açılış hissəsində Xəzər Universitetinin təsisçisi, Direktorlar və  Qəyyumlar Şurasının sədri Prof.Akad. Hamlet İsaxanlı çıxış edərək, universitetin inkişaf yolu, tələbə həyatının əhəmiyyəti və gənclərin cəmiyyətin inkişafındakı rolu haqqında fikirlərini bölüşdü.

Universitetin rektoru Dr. Raziyə İsayeva çıxışında tələbələrin təşəbbüskarlığını, yaradıcılığını və təşkilatçılıq bacarıqlarını yüksək qiymətləndirdi, festivalın ərsəyə gəlməsində əməyi olan təşkilat komandasına və könüllülərə təşəkkürünü bildirdi.

Tədbirin təşkilatçılarından olan Xəzər Universiteti Tələbə Məclisinin prezidenti Lalə İmanzadə festivalın tələbə təşəbbüsü əsasında formalaşdığını, tələbələrin yaradıcılıq və təşkilatçılıq potensialının bu cür layihələr vasitəsilə daha geniş şəkildə ortaya çıxdığını qeyd etdi.

Festival çərçivəsində universitetin müxtəlif tələbə klubları tərəfindən xüsusi stendlər təşkil olundu. Klublar öz fəaliyyətlərini təqdim edir, tələbələrlə interaktiv ünsiyyət qurur və müxtəlif fəaliyyətlər həyata keçirirdilər. Təqdim olunan stendlər arasında Kuantum İntellektual Oyunlar Klubu, Xəzər Tarix Klubu, ADAC Dizayn Klubu, HasVet Baytarlıq Klubu, Chinese Study Çin dili Klubu və Robototexnika Klubu yer almışdır.

Festival ərazisində food zona, foto və memory guşələri, interaktiv fəaliyyət sahələri və müxtəlif əyləncə məkanları yaradılmışdı.

Festivalın musiqili hissəsində Azərbaycan Mədəniyyət və İncəsənət Universitetinin tələbəsi, gənc xanəndə Gülyaz Həsənzadə Azərbaycan mahnılarını ifa etdi. Xəzər Universitetinin Musiqi Klubunun üzvləri də müxtəlif musiqi nömrələri ilə çıxış etdilər.

“KhazarFest 2026” tələbələr üçün həm sosial, həm mədəni, həm də yaradıcı baxımdan yaddaqalan kampus festivalına çevrildi.