Xəzər Universitetinin 35 illik yubileyi münasibətilə məktəblilər arasında təşkil olunan bilik olimpiadaları böyük maraqla qarşılanıb. Xəzər Universiteti və Gəncə “Dünya” Məktəbinin birgə təşkilatçılığı ilə 2026- cı il mayın 23- də riyaziyyat, mayın 24-də isə ingilis dili fənləri üzrə keçirilən olimpiadalar Gəncə “Dünya” Məktəbində olub.

Olimpiadada Gəncə-Daşkəsən və Qazax-Tovuz regional təhsil idarələrinin tabeliyində olan məktəblərdən 8, 9 və 10-cu siniflər olmaqla, yüzlərlə şagird iştirak edib.  

İştirakçılar hər iki fənn üzrə xüsusi hazırlanmış tapşırıqlar vasitəsilə öz biliklərini sınayıblar. Olimpiadanın keçirilməsində əsas məqsəd şagirdlərdə elmə marağın artırılması, sağlam rəqabət mühitinin formalaşdırılması və gənclərin akademik inkişafına dəstək göstərilməsidir.

Olimpiadaların keçirilməsi üçün Xəzər Universitetinin əməkdaşları Təbiət elmləri və Mühəndislik fakültəsinin dekanı Dr. Fəxrəndə Əfəndiyeva, Humanitar, təhsil və sosial elmlər fakültəsinin dekanı Dr. Milana Abbasova, Təbiət elmləri, sənət və texnologiya yüksək təhsil fakültəsinin dekanı Dr. Günel Bahəddinova, Riyaziyyat departamentinin müdiri Əli Hüseynli və departamentin müəllimləri, İngilis dili və ədəbiyyatı departamentinin müəllimləri Gəncə şəhərinə ezam olunublar.

Fakültə dekanları valideynlərlə görüş keçirib və Xəzər Universiteti haqqında, fakültələr, ixtisaslar barədə geniş məlumat veriblər və valideynlərin suallarını cavablandırıblar.

Qeyd edək ki, qaliblər Xəzər Universitetində təşkil olunacaq xüsusi mərasimdə pul mükafatı və sertifikatlarla təltif ediləcəklər.