Xəzər Universitetinin 2-ci kurs psixologiya tələbələri, psixologiya departamentinin müəllimi Musa Səmədlinin tədris etdiyi “Sosial iş” fənni çərçivəsində, bilik və bacarıqların əyani şəkildə artırılması məqsədilə 2026- cı il mayın 22- də Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyinin Əlilliyi Olan Şəxslərin Peşə-Əmək Reabilitasiyası Mərkəzində  olmuşlar.  Ekskursiyada Xəzər Universiteti Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov da iştirak etmişdir.

Səfər zamanı tələbələr mərkəzin fəaliyyəti, burada həyata keçirilən sosial dəstək proqramları, peşə hazırlığı və reabilitasiya xidmətləri ilə yaxından tanış olmuşlar. Onlara əlilliyi olan şəxslərin cəmiyyətə inteqrasiyası istiqamətində görülən işlər, sosial adaptasiya prosesinin əhəmiyyəti, peşə yönümlü təlimlərin insan həyatına təsiri barədə ətraflı məlumat verilmişdir.

Tələbələr müxtəlif emalatxanalarda təşkil olunan peşə hazırlığı prosesini izləyərək, xidmət alan şəxslərin əmək bacarıqlarının inkişaf etdirilməsi istiqamətində görülən praktiki işlərlə tanış olmuşlar.  Eyni zamanda, sosial iş mütəxəssislərinin fəaliyyəti, fərdi yanaşma prinsipləri, psixososial dəstəyin önəmi və inklüziv mühitin formalaşdırılması istiqamətində atılan addımlar barədə məlumatlanmışlar. Bu səfər tələbələrin nəzəri biliklərini praktik müşahidələrlə zənginləşdirməklə yanaşı, onların gələcək peşə fəaliyyətinə motivasiya qazandırmağa, empatiya hisslərinin daha da güclənməsinə yönəlik addımlara dəstək sayılır.