Xəzər Universitetinin təsisçisi, Direktorlar və  Qəyyumlar Şurasının sədri Prof.Akad. Hamlet İsaxanlı 2026-cı il mayın 18-də Gəncə şəhərində yerləşən Nizami Gəncəvi Muzeyində Beynəlxalq Muzeylər Gününə həsr olunmuş “Nəsildən - nəsilə bir yadigar” adlı akademik-bədii tədbirdə iştirak edib. Tədbir “Dünya” Məktəbi MMC - nin Nailəxanım Muzeyi, Cəfər Cabbarlı Ev Muzeyi və Nizami Gəncəvi Muzeyinin birgə təşəbbüsü ilə keçirilib.

ICOM - Beynəlxalq Muzeylər Şurasının builki “Muzeylər parçalanmış dünyanı birləşdirir” şüarı ilə  keçirilən tədbirdə Gəncə-Daşkəsən və Tovuz-Qazax regional mədəniyyət idarələrinin tabeliyində fəaliyyət göstərən 35-dən artıq muzeyin əməkdaşları iştirak ediblər. Bakı şəhərindən  Səməd Vurğunun  Ev Muzeyi, Abdulla Şaiqin  Ev Muzeyi, Üzeyir Hacıbəylinin Ev Muzeyi, Qara Qarayevin Xatirə Muzeyi, Niyazinin Mənzil-Muzeyi, Bülbülün Memorial Muzeyi və Cəfər Cabbarlı Ev Muzeyinin əməkdaşları tədbirə qatılıblar.

Tədbir çərçivəsində Nizami Gəncəvinin məqbərəsi ziyarət olunub, xatirəsi anılıb.

Tədbirdə Gəncə-Daşkəsən Regional Mədəniyyət İdarəsinin rəisi Nail Məmmədov, Milli Məclisin deputatı Pərvin Kərimzadə, AMEA Gəncə Bölməsinin sədr müavini Elmuxtar Muxtarov, Prof.Akad. Hamlet İsaxanlı, “Dünya” Məktəbinin direktoru Aygün İsayeva və başqaları çıxış ediblər.

Prof.Akad. Hamlet İsaxanlı geniş çıxışında muzeylər gününün artıq 50 ildir qeyd olunduğunu bildirib,  muzeylərin milli-mədəni irsin qorunması, gələcək nəsillərə ötürülməsi və cəmiyyətin maarifləndirilməsindəki mühüm rolunu vurğulayıb.

Bədii hissədə müğənnilər  İlahə Əfəndiyeva və Fərid Əliyev Azərbaycan klassik musiqisindən parçalar ifa ediblər. Gəncə “Dünya” məktəbi şagirdlərinin sözləri Hamlet İsaxanlıya, musiqisi Nailəxanım İsayevaya məxsus “İnci çiçəyi” mahnısının sədaları altında rəqsi maraqla qarşılanıb.

Tədbir çərçivəsində “Dünya” Məktəbi Nailəxanım Muzeyinin və Cəfər Cabbarlı Ev Muzeyinin səyyar sərgiləri də nümayiş olunub.

Eyni zamanda, tədbirdə “Dünya”  Məktəbi MMC - nin direktoru Aygün İsayeva Gəncə şəhərində maarif və mədəniyyətin inkişafında göstərdiyi xidmətlərə görə, Gəncə-Daşkəsən Regional Mədəniyyət İdarəsi tərəfindən təşəkkürnamə ilə təltif edilib.